Cafés a un euro: algo (case) xa imposible de atopar
O prezo medio dun café en cidades como A Coruña é dun euro e medio
É o café máis barato que atopamos na Coruña. Unha cunca a un euro. É prezo único. Dá igual que sexa só, cortado ou con leite. Aquí se vende o café arábica con tostado natural e sen aditivos.
"A xente non ten culpa de que o café me coste máis a min e por iso desde que abrín, hai 10 anos, a filosofía de empresa é que o café custa un euro e iso non o vai cambiar ninguén", explica Alejandro Martínez, propietario de Buddha Coffee, cafetería do barrio de Elviña.
En contraposición, os prezos máis caros encontrámolos en locais onde se serve o chamado café de especialidade ou gourmet. O expreso aquí é a 2 euros. Con leite, a 2,6.
"Nós manexamos todas as facetas do café desde que se recolle ata que chega o produto á cunca. Temos todo o control de calidade e para iso temos persoas que están especializadas en tostar, en testar, en probar o café, en catalo", comenta Miguel Fajardo, responsable de Waco Coffee na rúa Alameda da Coruña.
É unha das bebidas máis consumidas no mundo. Pero, ¿condiciona o prezo a elección dun café para a clientela ?
"Que sexa de especialidade ou non, pero que esta ben feito por que moitas veces o que falla é a persoa que o fai".
"Prefiro pagar un pouco máis e tomar un bo café e aquí temos un café barato e bo".
"Que sexa caro ou non, pois depende. É que lamentablemente estamos afeitos a vivir en Madrid así que temos a percepción do valor un pouco desvirtuada, non", conclúe un mozo.
Entre o caro e o barato hai un intermedio. Pagar arredor de euro e medio é o máis frecuente nas cafeterías da cidade da Coruña.
