O presidente do Dépor confía en sacar o club do concurso de acredores esta tempada

O presidente do Deportivo da Coruña Álvaro García Diéguez informou este martes de que o novo Consello de Administración espera que a entidade branquiazul finalice o concurso de acredores durante a tempada 2023/24, despois de pasar de 160 millóns de débeda a pouco máis de 19:

“Queremos conseguir que a saída do concurso se produza ao longo desta tempada. Estratexicamente sería moi importante para a volta ao fútbol profesional”, comentou o dirixente nunha conferencia de prensa.

Neste sentido, explicou que “non será necesario” convocar unha xunta de accionistas extraordinaria porque a decisión se tomará na xunta cos socios que se celebrará a finais de ano:

“No ámbito institucional tamén avanzamos polo camiño adecuado, tivemos un contacto permanente co Concello. Estamos a ter un trato fantástico e unha acollida moi boa por parte da alcaldesa e de todo o Concello”, comentou.

No plano deportivo, mostrouse satisfeito co persoal que configuraron “co mesmo orzamento do ano pasado”, e agradeceu o “tremendo” apoio que seguen tendo do deportivismo.

“Onte superamos os 26.000 abonados; esgótansenos os cualificativos”, afirmou o presidente branquiazul.

Tamén cualificou como “espectacular” o vivido o pasado sábado en Lugo, onde o equipo de Imanol Idiakez estivo arroupado por máis de 2.000 afeccionados.