O PP non cita por agora a Sánchez no Senado polo caso Koldo

O PP chamará a comparecer na comisión de investigación do Senado sobre o caso Koldo ao exministro de Transportes José Luis Ábalos, ao extitular de Sanidade Salvador Illa e ao expresidente da Federación de Fútbol, Luis Rubiales. Por agora non citou por agora o presidente do Goberno, Pedro Sánchez, nin a súa muller.

O PP rexistrou este luns unha primeira listaxe de 56 comparecentes dentro do plan de traballo para a comisión que investigará no Senado a presunta trama de corrupción en contratos de máscaras que salpica a varias administracións do PSOE e pola que foi detido Koldo García, exasesor de Ábalos ao que tamén citarán a comparecer.

A formación de Alberto Núñez Feijóo, que coa súa maioría absoluta marca quen acode ao Senado, non citou polo momento ao presidente do Goberno nin á súa muller, Begoña Gómez, aínda que recalcou que a listaxe pode ampliarse.

Na listaxe rexistrada polo PP figuran ademais os ministros de Interior ou de Transportes, Fernando Grande-Marlaska e Óscar Puente, que se suman a nomes que xa se coñecían como os da presidenta do Congreso, Francina Armengol, ou o ministro de Política Territorial, Ángel Víctor Torres, citados porque cando presidían Baleares e Canarias os seus gobernos contrataron coa empresa investigada na trama.

Outros altos cargos da contorna do Ministerio de Transportes aos que pide comparecer o PP son Álvaro Rodríguez Dapena, presidente de Portos do Estado, o seu antecesor, Francisco Toledo e o exsecretario xeral desta empresa pública, Álvaro Sánchez. Tamén Isaías Táboas (expresidente de Renfe), Isabel Pardo de Beira (expresidenta de Adif), Juan Manuel Serrano (presidente de Correos) e Ángel Contreras, presidente de Adif.

Os populares tamén citarán aos principais implicados na trama. Ademais de Koldo García chamarán ao seu irmán, Joseba, e á súa muller, Patricia Uriz; a Víctor de Aldama, presidente do Zamora C. F. e suposto comisionista, ou Juan Carlos Cueto, que segundo a investigación controlaría a compañía investigada. 

Íñigo Rotaeche, titular da empresa investigada por corrupción, Israel Pilar Ortiz, empresario investigado como suposto ligazón e José Luis Rodríguez, subtenente da Garda Civil destinado no Ministerio de Transportes que mantería reunións con Koldo, figuran tamén entre os 56 comparecentes.

Ademais, o PP pide que acuda á comisión algún membro do Instituto de Empresa, a entidade educativa da que dependía o IE Africa Center, que dirixiu a muller do presidente do Goberno, Begoña Gómez.

O PP tamén levará á comisión a Enriqueta Chicano, a actual presidenta do Tribunal de Contas, o organismo encargado de supervisar a contratación pública. A portavoz do PP no Senado, Alicia García, subliñou que a comisión de investigación busca que "o Goberno de explicacións dunha trama corrupta que nace no corazón do Partido Socialista, que se estende por varios ministerios e por comunidades autónomas que estaban entón gobernadas polo PSOE".

O PSOE resérvase máis comparecencias no Senado 

O PSOE resérvase solicitar máis comparecencias para unha segunda fase da comisión de investigación do Senado sobre o caso Koldo á vista da listaxe "extensa" que expuxo o PP, no que os socialistas ven persoas que "non teñen vinculación algunha" co obxecto da mesma.

O voceiro socialista no Senado, Juan Espadas, dixo que espera que o PP non vete esas novas comparecencias do seu grupo.

"O Partido Popular fixo unha listaxe extensa de comparecentes na que asombra comprobar que hai algunha proposta de comparecentes que, que saibamos, non teñen vinculación algunha co obxecto da Comisión que propuxo o propio Partido Popular", manifestou Espadas.

E despois engadiu que, en consecuencia, os populares deberían aceptar que os socialistas pidan declarar a outras persoas sobre "situacións parecidas de contratación de emerxencia noutras administracións".

A lista de comparecentes proposta polo Grupo Socialista do Congreso busca "aclarar e definir ben" o resultado das auditorías e os controis do Tribunal de Contas do Estado e dos órganos de fiscalización ou cámaras de conta que hai nas distintas comunidades autónomas.

Para iso, expuxo que comparezan ante a comisión de investigación os altos funcionarios da administración central e autonómicas como "elemento básico e fundamental" para, a partir de aí, extraer as conclusións que permitan logo poder identificar "calquera outro tipo de responsabilidade en calquera outro tipo de administración".

En concreto, nunha primeira fase propón que sexan chamados á Comisión a presidenta do Tribunal de Contas, Enriqueta Chicano, e os responsables do Tribunal Vasco de Contas Públicas, a Sindicatura de Comptes de Catalunya, o Consello de Contas de Galicia e as Cámaras de Contas de Andalucía e Aragón.

Tamén, da Sindicatura de Contas do Principado de Asturias, a interventora xeral das Canarias, a Cámara de Comptos de Navarra, a Oficina de Prevención e Loita contra a Corrupción nas Illas Baleares e o Consello de Contas de Castela e León.

De Madrid solicita dous comparecentes: o presidente da Cámara de Contas rexional, Carlos Salgado Pérez, e a interventora xeral da Comunidade entre outubro de 2019 e xullo de 2022, García Miranda.

Varios dos nomes suxeridos por populares e socialistas están nas listaxes de ERC e EH Bildu, que inclúen ademai o expresidente do PP Pablo Casado; o voceiro deste partido no Congreso, Miguel Tellado; e o alcalde de Madrid, José Luís Martínez Almeida.

Vox solicita a comparecencia da muller de Sánchez

Vox anunciou este luns que solicitará a comparecencia da muller do presidente do Goberno, Pedro Sánchez, tanto na comisión de investigación do Senado como na do Congreso.