Os policías locais de Santiago aproban sumarse aos bombeiros e deixar de facer horas extra

Os bombeiros de Santiago advertiron de que este venres volverá repetir a situación que o parque xa viviu o pasado luns, con persoal por baixo dos mínimos requiridos, o que o deixará "inoperativo" desde as 22.00 horas desta noite ata 24 horas despois. Segundo recolle un comunicado difundido en Instagram polos traballadores, a quenda desta xornada só contará con catro bombeiros e un xefe do equipo de garda, en lugar dos nove efectivos que require a quenda mínima.

"Con esta dotación, o parque permanece inoperativo polos seus propios medios, obrigando a solicitar apoio ao 112 para que mobilice parques doutros concellos ante emerxencias", expoñen.

Deste xeito, lamentan que Santiago "non poida garantir" a resposta "inmediata" ante un incendio, accidente ou rescate.

"Os bombeiros de Santiago seguimos cumprindo coa nosa responsabilidade e servindo os veciños con profesionalidade e entrega, pero non podemos facer máis con menos".

Esta circunstancia, que vén de atrás, levaba os bombeiros para reforzar as quendas a través das horas extra. Con todo, dado o atraso na súa cobranza, deixaron de facelas, unha medida que tamén decidiron adoptar axentes da Policía Local tras unha reunión celebrada na noite do mércores.

A decisión da Policía Local, ademais, ten lugar despois de que o Goberno local e as organizacións sindicais CCOO, UXT e CIG acordasen na xornada do mércores canalizar as conversacións sobre as reivindicacións de ambos os corpos a través dunha mesa de negociación.

Fontes sindicais lembraron que agora se debe acordar unha orde do día para a celebración desta semana e tamén a data da xuntanza.