O Parlamento venezolano aproba o proxecto de lei que amnistiará os presos políticos do chavismo

O Parlamento de Venezuela, de maioría chavista, deu un primeiro paso este xoves para aprobar unha lei de amnistía proposta pola mandataria encargada, Delcy Rodríguez, para os presos políticos dos últimos 27 anos de chavismo. Exclúe delitos como violacións graves dos dereitos humanos, crimes de lesa humanidade e crimes de guerra.

No primeiro dos dous debates necesarios para aprobar esta lei en Venezuela, o Lexislativo aprobou por unanimidade o proxecto, aínda que sen expoñer os trece artigos que contempla a norma.

O encargado de entregar o proxecto ao Parlamento foi Jorge Arreaza -deputado e exchanceler do presidente Nicolás Maduro- quen explicou que a proposta exclúe a aqueles procesados e condenados por violacións graves dos dereitos humanos, crimes de lesa humanidade, crimes de guerra, homicidio intencional, corrupción e tráfico de drogas.

O tamén xenro do falecido presidente Hugo Chávez (1999-2013) dixo: "Obríganos a patria para ser responsables, a sandar feridas, a recoñecernos, a entendernos e a construír en conxunto os pasos e os camiños".

"Pedimos perdón e temos que perdoar"

Na súa alocución, o presidente do Parlamento e irmán da mandataria encargada, o chavista Jorge Rodríguez, manifestou: "Nós pedimos perdón e temos que perdoar tamén, pedimos perdón porque digo con claridade: a min non me gustan os presos".

O deputado, que iniciou a súa intervención lembrando a historia do seu pai, quen, dixo, foi asasinado por un extinto corpo policial no primeiro Goberno de Carlos Andrés Pérez (1974-1979, 1989-1993), pediu "que non quede unha vítima que non fose escoitada".

Insistiu "na necesidade de sandación, na necesidade de curar as feridas, na necesidade de sempre ter presente a madrugada do 3 de xaneiro do ano 2026, o asasinato de 120 seres humanos, o secuestro do presidente".

O parlamentario referiuse así ao ataque que sufriu Venezuela a madrugada do 3 de xaneiro por parte dos Estados Unidos e que terminou coa captura do presidente Nicolás Maduro e a súa esposa, a deputada Cilia Flores, ambos arrestados agora en Nova York.

"Vostedes van pedir polos seus presos? Nós imos pedir mentres nos quede vida polos nosos presos, por Nicolás Maduro, polos nosos secuestrados Nicolás Maduro e Cilia Flores de Maduro", continuou.

O fillo de Maduro, o deputado Nicolás Maduro Guerra, tamén levantou a voz polo seu pai e dixo que era necesario "remar cara a" a unificación do país, sen "violencia, sen odios, sen mísiles, sen invasión militar, sen secuestros de presidentes".

Maduro Guerra rescatou esta frase do deputado opositor, Luis Augusto Romero: "Venezuela non aguanta unha vinganza máis".

Os opositores piden garantías

Os deputados opositores propuxeron que na lei estableza garantías para que os presos políticos que sexan liberados poidan reincorporarse á vida pública sen medo a "represalias".

O deputado Tomás Guanipa, cuxos irmáns Pedro e Juan Pablo -aliado da nobel da paz María Corina Machado- están privados de liberdade, dixo que o texto "debe ter todas as garantías e os estándares internacionais para que sexa unha lei para todos por igual".

Guanipa expresou a súa confianza en que a normativa marque "o inicio dunha nova etapa histórica" de reencontro no que a xente deixe de sentir "temor a dicir o que pensa por medo a ser apresado".

Tras a aprobación da lexislación, a presidenta encargada saudou o debate parlamentario que, considerou, foi "de altura" e destacou a importancia de manter a política "entre os venezolanos".

"A reconciliación debe ser a dúas partes, non perdan esta oportunidade. Estamos a estenderlles a man, e nós esperamos que con madurez política saibamos enfrontar este novo desafío".

O proxecto lexislativo chegou no medio dun proceso de excarceracións anunciado o pasado 8 de xaneiro por Jorge Rodríguez. Desde esa data, polo menos 383 presos políticos foron excarcerados en Venezuela, segundo datos da ONG Foro Penal que ata o 2 de febreiro cifraba en 687 os presos políticos.

Con todo, o ministro de Interior e Xustiza, Diosdado Cabello, cifrou o luns o total de excarcerados no 895 desde novembro e negou a existencia de presos políticos no país.