O Parlamento debate a reforma para cubrir por concurso as prazas de urxencias do CHUO
O pleno, o último deste curso político, tratará por vía de urxencia a modificación legal impulsada pola Xunta e abordará tamén as riadas en Ourense e o plan estatal de vivenda
Foto de arquivo - Parlamento
O Parlamento de Galicia debaterá este martes, por vía de urxencia e lectura única, a reforma legal impulsada pola Xunta para declarar de difícil cobertura as prazas do servizo de Urxencia do Complexo Hospitalario de Ourense (CHUO) e poder cubrilas mediante concurso.
A tramitación, que permitiría aprobar a modificación nesta mesma sesión, conta co rexeitamento do BNG e do PSdeG, que consideran que a situación da sanidade pública require unha reforma de maior alcance.
O pleno, o último antes do remate do período de sesións, incluirá tamén a comparecencia da conselleira de Vivenda María Martínez Allegue sobre o plan estatal de vivenda e mais as preguntas da oposición ao presidente da Xunta Alfonso Rueda, xa este mércores.
Ademais, os grupos parlamentarios abordarán os danos provocados polas riadas do pasado 17 de xuño en varios concellos da provincia de Ourense.
