O Papa di que unha posible visita a Kíiv está "sobre a mesa"
Así o dixo o pontífice no avión que o trasladaba a Malta ante preguntas dos xornalistas
O papa Francisco podería viaxar a Ucraína, escenario dunha guerra tras a invasión do país por parte de Rusia. Ante preguntas dos xornalistas durante o voo que o levaba a Malta este sábado sobre se estaba a tomar en consideración a invitación para ir a Kíiv, Francisco respondeu: "Si, está sobre a mesa".
Tanto o presidente de Ucraína , Volodimir Zelenski, como o alcalde de Kíiv, Vitali Klitschko invitaron o pontífice a viaxar ata este país para mostrar a súa proximidade á poboación ucraína por unha guerra que o papa criticou de xeito reiterado, ademais de ofrecerse para facer "todo o necesario" para conseguir que finalice.
Francisco e Zelenski falaron por teléfono o 22 de marzo, cando o mandatario ucraíno lle asegurou ao papa que era "o invitado máis agardado no país", mentres que o pontífice díxolle que "reza e fai todo o posible para poñerlle fin á guerra, provocada pola invasión de Rusia".
Con anterioridade o alcalde de Kíiv envioulle unha carta a Francisco para invitalo a visitar a cidade. "Cremos que a presenza dos líderes relixiosos do mundo en Kíiv é clave para salvar vidas e aplanar o camiño cara á paz na nosa cidade, no noso país e en todos os lugares", escribiu daquela Klitschko.
O Vaticano confirmou a chegada da misiva e agregou que Francisco "estaba próximo aos sufrimentos da cidade, á súa xente, aos que tiveron que fuxir e aos que están chamados a administrala".
