O Ourense C. F. gaña a Copa Federación na quenda de penaltis

O Ourense Club de Fútbol continuará o seu periplo na Copa Federación logo de gañar o sector galego. Lembremos que o ano pasado o Arenteiro, por esta vía, acabou clasificándose para xogar a Copa do Rei. 

O equipo ourensán impúxose na quenda de penaltis despois dun encontro no que se notou a carga de traballo destas cinco semanas de pretemporada. No primeiro tempo as mellores ocasións foron para o equipo das Burgas, sobre todo unha de Facu Ballardo que fallou cando o máis doado era rematar á rede.

Na segunda parte tampouco se moveu o marcador. Tiveron que xogalo todo nunha quenda de penaltis na que Raúl Marqueta se converteu en protagonista ao parar os dous primeiros lanzamentos dos xogadores do Rácing Vilalbés.