Carmona agarda que a revisión da lei do 'só si é si' garanta unha regulación penal máis dura que protexa as vítimas

A raíz do último asasinato por violencia machista en Baiona, e coa revisión da lei do 'só si é si' de fondo, este martes, na Radio Galega, entrevistamos á Presidenta do Observatorio contra a Violencia Machista en España, Ángeles Carmona. 

Carmona elevou a vinte os asasinatos de mulleres a mans das súas parellas ou exparellas nos últimos dous meses, nove no que vai de ano. A presidenta do Observatorio incidiu en que cómpre seguir traballando e fixo un chamamento á contorna das vítimas para que denuncien estes casos ante a mínima sospeita.

"Dificilmente se pode saír sen axuda e se as autoridades non teñen coñecemento de que esa muller pode estar en perigo", puntualizou.

Carmona puxo o foco nas medidas que se veñen adoptando na loita contra a violencia machista. Con todo, incidiu, cómpre investir nas institucións e continuar traballando no sistema de protección ás vítimas, impulsando o uso dos dispositivos electrónicos como a pulseira que, insistiu, están a salvar vidas.

"A pulseira está sendo unha ferramenta eficaz, que pretende ampliarse a outro tipo de violencias, como a sexual. Estase empregando na violencia en parella. Actualmente máis de 3100 mulleres están sendo protexidas grazas a esta tecnoloxía", manifestou.

A representante do Observatorio puxo en valor o traballo que están realizando Ministerio do Interior e Fiscalía, para que as mulleres denunciantes poidan coñecer antecedentes penais das súas parellas nos casos nos que exista unha valoración de risco extrema ou alta.

Revisión da lei do 'só si é si'

Sobre a reforma da lei do 'só si é si' e o agravamento das penas que propón o PSOE, puntualiza Carmona que mentres estes cambios non entren en vigor, non se evitarán as revisións de condenas. Non obstante, o ámbito xurídico agarda unha regulación máis dura que transmita tranquilidade ás vítimas. 

"A revisión e perfeccionamento da lei é unha boa noticia. Agardo que xere tranquilidade nas vítimas e que no sucesivo estes delitos se consideren moi graves".

A presidenta do Observatorio na loita contra a Violencia Machista puntualizou que os cambios propostos polos socialistas na lei do si é si non atacan o modelo do consentimento porque xa aparecía recollido na xurisprudencia española con anterioridade á Lei. Aclarou Carmona que o agravamento das penas non ten que ver coa definición do consentimento.