Marlaska quéixase ao Poder Xudicial da xuíza que investiga Ceuta e Perelló pide respecto

O ministro do Interior remitiu un escrito á presidenta do Consello Xeral do Poder Xudicial no que lle transmite a súa "preocupación" pola decisión da xuíz da Audiencia Nacional de prohibir ao equipo policial que investiga a crise migratoria en Ceuta facilitar información aos seus superiores sobre as súas pescudas.

Segundo informou o propio Ministerio, no texto da carta Grande-Marlaska asegura que, na súa dobre condición de ministro do Interior e de maxistrado, respecta "escrupulosamente" a independencia xudicial, o deber de prestar colaboración aos órganos xudiciais e a dependencia exclusiva da policía xudicial dos xuíces, tribunais e do Ministerio Fiscal.

Con todo, ante unha crise que obrigou a declarar a situación de interese para a seguridade nacional baixo o amparo da Lei 36/2015, de Seguridade Nacional, o titular de Interior defende que "non debería ser incompatible" atender con dilixencia os requirimentos dos órganos xudiciais con informar os responsables políticos das circunstancias que resulten relevantes para a xestión dunha situación de tal magnitude.

Neste sentido, o ministro argumenta que a información en mans da Policía Nacional resulta "de grande interese" para que o Executivo poida exercer correctamente as súas funcións de dirección da política interior e exterior e de defensa do Estado.

Isabel Perelló responde que a maxistrada da Audiencia Nacional cumpriu a súa función: "Debemos amosar o máximo respecto"

A presidenta do Tribunal Supremo e do Consello Xeral do Poder Xudicial defendeu que a xuíza da Audiencia Nacional María Tardón actuou no "exercicio das súas funcións constitucionais" co informe policial que encargou respecto á entrada masiva de inmigrantes en Ceuta, polo que pediu "o máximo respecto", en resposta á carta que lle enviou o ministro do Interior, Fernando Grande-Marlaska, mostrando "preocupación" pola decisión da instrutora de prohibir ao equipo investigador da Policía Nacional informar os seus superiores.

Segundo comunicou este xoves o CXPX, Perelló contestou con outra carta a Grande-Marlaska para subliñar que os órganos de goberno do Poder Xudicial "teñen constitucional e legalmente vedado aprobar, censurar ou corrixir actuacións xudiciais".

"En definitiva, estou, como non pode ser doutro xeito, plenamente de acordo contigo nas túas apreciacións sobre a gravidade e o carácter extraordinario da crise que estamos a enfrontar, así como en que a actuación da maxistrada responde o exercicio das súas funcións constitucionais, polas que todos debemos mostrar o máximo respecto", trasladou Perelló ao ministro.

O informe elaborado polo Centro Nacional de Intelixencia e Fronteiras da Policía atribúe a xendarmes marroquís o "guiado activo" de inmigrantes cara a Ceuta o pasado 30 e 31 de xullo.