O Ministerio de Traballo apraza o debate parlamentario sobre a redución da xornada laboral

O Ministerio de Traballo decidiu aprazar ata o próximo período de sesións o debate parlamentario sobre o proxecto de lei de redución da xornada laboral, co que dá así máis tempo á negociación con Junts per Catalunya que presentou unha emenda á totalidade.

Segundo un comunicado do departamento que lidera Yolanda Díaz, decidiuse dar máis tempo aos traballos cos grupos parlamentarios "para que se poida superar a fase de totalidade no próximo período de sesións".

O debate estaba inicialmente previsto para o próximo 22 de xullo pero, apuntan fontes do Ministerio de Traballo, o momento político "non é o adecuado".

Junts pediu máis tempo para negociar. No comunicado do Ministerio de Traballo explícase que se mantivo unha nova reunión dos equipos negociadores de Traballo e os de Junts per Catalunya no marco de contactos coas diversas forzas políticas para a tramitación parlamentaria do proxecto de lei para a redución de xornada ás 37,5 horas semanais.

Junts per Catalunya, expón o comunicado, lembrou o seu interese en protexer ás pymes, autónomos e traballadores de Cataluña e subliñou que a lei non é posible sen consenso.

"Debe ser unha oportunidade para as pymes e que recolla todas as peticións algo que require, en todo caso, de tempo e seguir traballando", engade a nota.

Por iso, o Ministerio de Traballo e Economía Social "decidiu dar máis tempo a estes traballos para que se poida superar a fase de totalidade no próximo período de sesións".

O obxectivo, no que o departamento de Yolanda Díaz leva semanas negociando, é que Junts retire a súa emenda á totalidade ao proxecto para que poida continuar así a súa tramitación parlamentaria, algo que, polo momento, deberá esperar uns meses máis.