O lume avanza sen control no Ribeiro ameazando aldeas e obrigando a cortar a A-52
O incendio que comezou o venres en Carballeda de Avia uniuse ao de Beade e xa levan calcinadas máis de 2.500 hectáreas
As lapas afectáronlle á autovía das Rías Baixas, que tivo que cortarse totalmente ao tráfico entre Melón e Ribadavia
Momentos de tensión os que se viviron o domingo pola tarde na aldea de Santo Estevo, en Carballeda de Avia. A forza do vento fixo que as lapas avanzaran moi rápido a chegaran ás casas. Tamén foi complicada a situación noutras localidades como Sas ou Vilariño. Mentres rematan un foco preto do colexio, na capital do concello, membros da brigada municipal destacan o complicado que está a ser a extinción e o cansazo que levan acumulado tras días de loita contra a lapas.
O lume comezou o venres pasado na parroquia de Vilar de Condes e uniuse este domingo ao outro incendio que había no Ribeiro, o das Regadas, en Beade, que afecta ao bosque de Ridimoas. Entre os dous levan calcinadas máis de 2.500 hectáreas, segundo os últimos datos de Medio Rural.
