O Lugo perde no Anxo Carro ante dun Éibar en inferioridade (0-2)

O Lugo manténse na penúltima praza e complica as opcións de salvación logo de perder ante o Éibar nun partido que se lle puxo costa arriba na primeira metade. O primeiro gol ía chegar desde o punto de penalti. Unhas mans de Pantic logo dun lanzamento de Muñoz foron sancionadas inicialmente fóra da área. Pero, previa consulta co VAR, Óliver de la Fuente sinalaba os once metros. Stoichkov transformou a pena máxima.

Co 0-1, o Éibar pasou a dominar o partido no treito final da primeira metade, pero o VAR ía volver ser determinante. Xa co tempo cumprido, unha acción de Javi Muñoz no centro do campo foi novamente consultada no monitor, e o futbolista do Eibar viu o cartón vermello, deixando aos seus toda a segunda metade con dez.

Pero o Lugo non deu tirado proveito da superioridade. Intentouno sen acerto durante todo o segundo tempo, pero non deu rematado ata o 85, cando unha cabezada de Sebas Moyano non atopaba portería. E, xusto despois dese remate, Whalley tivo que empregarse a fondo nunha dobre ocasión para evitar o segundo. Pero no tempo engadido, Bautista si que atopou o premio do 0-2.

Non houbo tempo para máis. O Lugo apañou unha nova derrota, que lle complica aínda máis as opcións da salvación.