O Ibex 35 cae un 1,9 % na apertura, co prezo do cru e o gas de novo á alza

O Ibex 35 iniciou a sesión deste luns, a primeira da semana, cunha caída do 1,87 %, o que o levou a perder os 16.500 enteiros, nun contexto marcado pola alza das materias primas, sobre todo do cru, que se sitúa xa ao bordo dos 114 dólares por barril polo conflito en Oriente Próximo.

O presidente estadounidense, Donald Trump, insistiu este domingo no ultimato de 48 horas que deu o sábado para que Irán reabra o estreito de Ormuz ou, pola contra, atacará as centrais eléctricas do país, advertindo de que haberá "unha destrución total" se cumpre a súa ameaza.

Como resposta á ameaza de Trump, a Garda Revolucionaria de Irán advertiu de que se Estados Unidos ataca as centrais eléctricas iranianas, a resposta será o "peche total" do estreito de Ormuz.

As principais bolsas europeas iniciaban a xornada con signo negativo, con baixadas do 1,8 % para Milán, do 1,93 % para Frankfurt, do 1,39 % para París e do 1,38 % para Londres.

Igualmente, as principais bolsas asiáticas rexistran fortes correccións este luns. O Kospi surcoreano pechou cun descenso de case o 6,5 %, mentres que o índice Hang Seng de Hong Kong baixou máis dun 3,5 % e a Bolsa de Shanghai caeu un 3,7 %. No Xapón, o Nikkei terminou a súa cotización cun retroceso de case o 3,7 %.

Neste escenario de incerteza, en que continúan as dificultades para atravesar o estreito de Ormuz, por onde circula ao redor dunha quinta parte do petróleo e o gas mundial, o cru mantense moi por encima dos 100 dólares.

O director da Axencia Internacional da Enerxía (AIE), Fatih Birol, tachou de "moi grave" a crise enerxética actual, enmarcada no bloqueo do estreito de Ormuz e os ataques a infraestruturas enerxéticas de Oriente Próximo, á vez que augurou que "ningún país" será "inmune" aos seus efectos, polo que avogou por un "esforzo global" de todos os países para abordala conxuntamente.

O prezo do barril de Brent, de referencia en Europa, subía un 1,1% ata os 113,4 dólares, á vez que o West Texas Intermediate (WTI), de referencia nos Estados Unidos, avanzaba un 2,7 %, ata os 100,85 dólares.

Pola súa banda, o prezo do gas no mercado de futuros holándes, de referencia europea, escalaba máis dun 4,26 % ás 9.13 horas, ata os 61,75 euros por megawatt hora.

Finalmente, no mercado de divisas, a cotización do euro fronte ao dólar colocábase en 1,1533 billetes verdes, en tanto que o interese esixido ao bono español a dez anos ascendía ata o 3,61 %.