O HULA conta coa primeira unidade cardiorrenal de Galicia

No hospital Lucus Augusti está en funcionamento a primeira unidade cardiorrenal de Galicia, que fai un seguimento exhaustivo e coordinado de pacientes con dobre patoloxía de corazón e ril. A mellora da calidade asistencial a estes doentes espertou o interese doutros centros sanitarios galegos e españois, que estudan a implantación da unidade nos seus hospitais.

Moitos pacientes con insuficiencia cardíaca acaban desenvolvendo algunha patoloxía renal; e ao revés. Enfermos complexos que requiren unha atención especial. 

O doutor Jesús Calviño, xefe de nefroloxía do HULA, di que a enfermedade renal e a enfermidade cardíaca camiñan da man. Son enfermos comúns que viñan ás dúas consultas e tiñamos que poñernos de acordo entre as dúas especialidades e consensuar porque ás veces o que é bo para o corazón e malo para o ril e viceversa.

Para mellorar e coordinar a atención asistencial, no HULA funciona dende hai un ano a primeira unidade cardiorrenal de Galicia. O doutor Carlos González Juanatey, xefe de cardioloxía do HULA, di que son pacientes moi complexos e que con frecuencia fan difícil o axuste do tratamento e a toma de decisións que evidentemente teñen que ser conxuntas.

A unidade cardiorrenal permite unha valoración no mesmo día das dúas especialidades. Vixían con atención a evolución e tratamento de 50 pacientes con insuficiencia cardíaca e renal en estadios avanzados.

González Juanatey destaca que houbo unha destacada redución nos reingresos entre eses 50 pacientes, mellorando e optimizando o tratamento médico. Opina o mesmo o doutor Calviño para o que abordar o tratamento dos pacientes neste tipo de consulta máis intensiva permite aos facultativos anticiparse a unha posible descompensación do paciente.

Resultados, e resultados satisfactorios, que espertaron o interese doutros hospitais galegos, para constituír unidades multidisciplinares para coordinar a atención clínica aos pacientes.