O Goberno prevé investir 13.590 millóns na rede eléctrica ata 2030, un 65 % máis

O Goberno propón un investimento de 13.590 millóns de euros nas redes de transporte de electricidade de aquí ao ano 2030, unha contía un 65 % superior á prevista na planificación actual (2021-2026) que axudará a impulsar a demanda.

Así o detallou a vicepresidenta do Goberno e ministra para a Transición Ecolóxica Sara Aagesen, quen presentou este venres a proposta de planificación da rede de transporte de electricidade 2025-2030.

O plan, que agora sae a información pública, está orientado a cubrir as necesidades de demanda e a cumprir os obxectivos do Plan Nacional Integrado de Enerxía e Clima (PNIEC).

“Hoxe presentamos un novo marco para desenvolver unha rede eléctrica moderna que nos permita seguir electrificando a nosa economía, unha oportunidade país”, sinalou Aagesen.

A proposta prevé multiplicar por 14 o acceso á rede de transporte para novos consumidores, ata 27,7 xigawatts (GW), con especial peso para a industria (9 GW), o hidróxeno verde (13,1 GW) e os centros de datos (3,8 GW). En xeración, rexistráronse solicitudes por 150 GW de fotovoltaica, 60 GW de eólica e máis de 100 GW de almacenamento.

O Ministerio iniciou tamén a audiencia pública dun real decreto que regulará os plans de investimento en redes de transporte e distribución e incrementará os límites de investimento e fixará mecanismos de control para garantir o seu cumprimento.

Segundo cálculos do Executivo, cada millón de euros investido en redes xera un impacto de 1,27 millóns en valor engadido bruto e un multiplicador de 20 en creación de emprego.