O Goberno estima que a economía medrará o 2,6 % no 2026
O Consello de ministros aproba o cadro macroeconómico, o primeiro trámite para os Presupostos Xerais do ano que vén
A próxima semana celebrarase un Consello de Política Fiscal e Financeira
Intentou antes pero, en toda a lexislatura, o Goberno non conseguiu aprobar uns presupostos xerais. Volve a intentalo este martes en que o Consello de Ministros aprobou o cadro macroeconómico, a primeira pedra sobre a que construiír unhas contas públicas.
Estima que a economía medrará este ano un 2,6 % e que o paro baixará do 10 %. Para a semana que vén, convoca as comunidades autónomas nun Consello de Política Fiscal e Financeira para fixar o teito de gasto e os obxectivos de déficit.
Segundo Carlos Cuerpo, vicepresidente primeiro e ministro de Economía, o seu obxectivo é "ir cumprindo prazos cun calendario regular", e, polo momento, indica, van "ben".
Pero Sumar parece desconfiar do socio e mete presión.
"Estamos na recta final da lexislatura e pídolle ao PSOE que actuemos", instou Yolanda Díaz, vicepresidenta segunda e ministra de Traballo.
Pero o Goberno non o vai ter fácil no Congreso, perdeu o apoio da maioría dos socios, entre eles, de Podemos. Segundo o seu voceiro, Pablo Fernández, "Pedro Sánchez mexa pola xente e dilles que chove".
Cada vez máis voces piden un adianto electoral, con máis rotundidade o PP.
Alberto Núñez Feijóo cre que Pedro Sánchez está facendo "enxeñería electoral" para alterar o censo electoral coa chamada lei de netos. Nunha entrevista en esRadio, o líder dos populares asegurou que "como cos votantes actuais non lle saen as contas, imos ver se fabricando votantes lle saen as contas".
