O Goberno aprobará en xullo un paquete de medidas de vivenda con prórroga dos alugueiros

O Goberno ha aprobar durante o mes de xullo un "importante" paquete de medidas en materia de vivenda que, entre outras medidas, recolle un aumento do IVE ao 21% para os pisos turísticos ou a prórroga dos contratos de alugueiro.

"Trátase dun real decreto amplo e transversal" que incluirá propostas apoiadas polas distintas forzas políticas ao longo da lexislatura co obxectivo de que todos os grupos se sintan representados, segundo indicou na rolda de prensa posterior ao Consello de Ministros.

Para iso, apuntou, van traballar cos grupos para que este texto vexa a luz en xullo e se consiga un acordo.

As medidas estruturaranse en dous bloques, aquelas orientadas a baixar o prezo, dar estabilidade aos contratos e combater a fraude no alugueiro e outras medidas para mobilizar vivenda accesible.

Dentro do primeiro destes bloques inclúese, entre outras, a regulación dos alugueiros de tempada e de habitacións, a prórroga extraordinaria dos alugueiros, a obrigatoriedade de que os contratos sexan por escrito e bonificacións no IRPF para quen baixe o prezo do alugueiro.

Para mobilizar vivenda accesible, a ministra portavoz referiuse tamén a outra serie de medidas, como o incremento do IVE ao 21 % para os pisos turísticos ou medidas de axilidade administrativa.

"Un problema como o da vivenda só se pode resolver desde o acordo e se hai un motivo hoxe en día para acordar é, sen lugar a dúbidas, dar resposta á principal preocupación da cidadanía", destacou a tamén ministra de Inclusión, Seguridade Social e Migracións.

Desta forma, espérase que nas próximas semanas o Consello de Ministros aprobe este conxunto de medidas.

Sumar ve marxe para o acordo con Junts

Desde Sumar, Ernest Urtasun, ministro de Cultura, indicou que este acordo co PSOE vai incorporar a prórroga dos alugueiros, que para eles era fundamental e que demostra que "non baixaron os brazos" con esta medida, e considera que hai marxe para o acordo.

Engade que Junts pediu medidas en materia de fiscalidade, das que eles están dispostos a falar e, polo tanto, hai marxe para ese acordo. "Aquí ninguén pode faltar, todo o mundo ten que estar á altura", indicou este luns.

Ademais, puntualizou que Junts pediu algún axuste en relación á prórroga que están dispostos a estudar, pero o groso da medida é o que xa se levou ao Congreso no seu momento.

O Goberno aprobou o 20 de marzo, nun Consello de Ministros marcado polas desavinzas con Sumar, unha prórroga de dous anos dos contratos de alugueiro. Con ela prorrogábanse durante dous anos todos os contratos que remataban ata o 31 de decembro de 2027.

Con todo, a medida foi rexeitada no Congreso dos Deputados por PP, Vox e Junts, o que impediu a convalidación do real decreto no que se incluía.

Pola súa banda, Compromís esixe que a regulación dos alugueiros sexa competencia local e que é imprescindible recuperar a prórroga, que os alugueiros sexan obrigatoriamente por escrito e que se avance na regulación dos prezos do alugueiro de tempada e de cuartos.