O galego Vari Caramés, premio Nacional de Fotografía 2026

O fotógrafo galego Vari Caramés foi galardoado co Premio Nacional de Fotografía 2026, a proposta do xurado reunido este martes. O premio, concedido polo Ministerio de Cultura, está dotado con 30.000 euros.

O xurado destacou a obra do artista galego por "a vixencia e contemporaneidade do seu traballo, a súa achega á fotografía artística e contribución á renovación cultural galega desde os anos 80".

O xurado destaca a súa "particular poética visual e universo recoñecible"

Ademais, o xurado sinalou "a súa ampliación das posibilidades expresivas, manchas, reflexos e os seus característicos desenfoques que achegaron a fotografía á abstracción pictórica", e destacan o seu "particular poética visual e universo recoñecible ao longo da súa traxectoria".

O premio recoñeceu na súa pasada edición a Carmela García, uníndose a unha ampla lista de galardoados, entre quen se atopa Laia Abril, Cristóbal Hara, Pilar Aymerich, Ana Teresa Ortega Aznar, Montserrat Soto ou Leopoldo Pomés.

O  mar e a rúa, temas recorrentes de Caramés 

O artista Vari Caramés (Ferrol, 1953) é un fotógrafo autodidacta galego. Con 15 anos o seu pai regaloulle unha cámara Voigtlander manual para que fotografase os seus cadros, debuxos e pezas de ferro forxado e máis tarde utilizou a fotografía nos seus estudos de Arquitectura Técnica.

Empezou a expoñer os seus traballos na Coruña en 1980. En 1986 foi invitado a participar no proxecto da segunda edición da Fotobienal Vigovisións, no que seis fotógrafos de diferentes países retrataron Vigo durante unha semana.

Posteriormente expuxo en Madrid e Barcelona de forma individual e de forma colectiva en diferentes cidades de España, Portugal e Francia.

Entre as súas exposicións destacan 'Algo. Nada. Sempre' na Sala Canal de Isabel II (Madrid, 2022), 'Lugares' (A Coruña, 2019), 'Pasatempo' (Santiago, 2013), 'Nadar' (A Coruña, 2010) ou 'Recreo' (Santiago de Compostela, 2008).