O Forovax, o congreso sobre vacinas máis importante de España, desenvólvese en Santiago

Galicia é hoxe o centro da reunión do Forovax 2022, na que importantes expertos reclaman a importancia crucial na vacinación na loita contra enfermidades infecciosas. Falan tamén da necesidade de coidar a saúde do planeta e a saúde animal para minimizar o impacto de futuras pandemias.

"Entender que para avanzar en saúde humana é fundamental avanzar en saúde animal e en saúde ambiental", explica Amós García Rojas, presidente da Asociación Española de Inmunoloxía.
 

Reclamar o concepto 'One Health', da ONU, que a saúde é unha e depende da saúde da natureza é unha das conclusións do encontro de hoxe. Os principais expertos en vacinas, inmunoloxía e saúde pública do Estado reúnense en Compostela e remarcan a evidencia científica que ampara as decisións sobre vacinas das autoridades sanitarias.

"Podemos trasladar á poboación que cando se aproba unha vacina, desde a Consellería ou o Ministerio, é unha decisión basada en probas e que sempre hai unha observación moi rigurosa tanto da eficacia como da seguridade", dixo a directora xeral de Saúde Pública, Carmen Durán.
 

Os expertos do Forovax falaron tamén das vacinas do futuro, perfeccionadas e mesmo personalizadas e da capacidade de adaptar vacinas case atendendo as características individuais baseadas na análise xenómica.

Entre as novas que deixou este congreso están que a vacina do papiloma para nenos varóns será incluída este mesmo ano en Galicia. En outono será a segunda dose de reforzo, ou sexa a cuarta contra a covid, para maiores de oitenta. E a da varíola do mono administrarase de momento a contactos estreitos de infectados só se son vulnerables e tamén aos sanitarios en contacto que tivesen algún problema co seu equipo de protección individual.