O fiscal oponse á prórroga da instrución do caso de Begoña Gómez
Lémbralle ao xuíz Peinado que "non resulta precisa a prórroga dos prazos de instrución cando se trata dun procedemento ante o tribunal do xurado"
O fiscal recorreu a decisión do xuíz Juan Carlos Peinado de seguir investigando, polo menos seis meses máis, a causa contra Begoña Gómez por un erro técnico, xa que non é necesario prorrogar a instrución nun procedemento que se rexe pola lei do tribunal do xurado, como determinou o maxistrado.
A Fiscalía recorreu perante o xulgado de Instrución 41 de Madrid o auto no que, o pasado 10 de outubro, o xuíz Peinado decidiu prorrogar a causa polo menos ata o 16 de outubro do ano que vén, cando fai dous anos de que abriu o caso. Fíxoo ao considerar que aínda quedan pendentes varias dilixencias acordadas, que "dificilmente poden ser cumprimentadas" antes deste xoves 16 de outubro, día no que vencía o prazo de instrución.
Con todo, o fiscal lémbralle ao xuíz que "non resulta precisa a prórroga dos prazos de instrución" cando se trata dun procedemento ante o tribunal do xurado que ten as súas propias especialidades e secuencias probatorias" e non rexen as limitacións que si impón a lei a outros tipos de procedementos.
Este procedemento ante o tribunal do xurado "ten evidente substantividade propia, cun xuíz instrutor que se coloca nunha posición de maior imparcialidade, e con dilixencias de proba sometidas por regra xeral á petición de parte, cuns prazos e momentos taxados", engade.
O xuíz decidiu hai unhas semanas que esta causa -na que se investigan delitos como tráfico de influencias, corrupción nos negocios, intrusismo e apropiación indebida-, en caso de chegar a xuízo, fose xulgada por un xurado popular.
Recurso de Barrabés
O empresario Juan Carlos Barrabés, tamén investigado neste procedemento, recorreu ante a Audiencia Provincial esa decisión de transformar as dilixencias en procedemento para que os feitos fosen xulgados ante o Tribunal do Xurado.
No seu recurso de apelación, afea que o xuíz non concrete os feitos e condutas que imputa a cada investigado e sostén que só un delito, o de tráfico de influencias, é competencia do xurado e "carece de sentido" que arrastre aos outros tres que se investigan: corrupción nos negocios privados, intrusismo e apropiación indebida.
