O español illado en Madrid por sospeita de hantavirus presenta febrícula e síntomas respiratorios

O español illado no Hospital Gómez Ulla de Madrid por dar positivo provisional na proba PCR para detectar o hantavirus, presentou esta noite febrícula e síntomas respiratorios, aínda que hoxe por hoxe se atopa aparentemente estable e sen empeoramento clínico evidente, segundo informa o Ministerio de Sanidade.

Este paciente atópase na Unidade de Illamento e Tratamento de Alto Nivel (Uatan) do centro, construída no hospital militar tras a crise do ébola e que conta con medidas de seguridade como circuítos diferenciados de entrada e saída, controis de acceso, presión negativa e desinfección en cada un dos cuartos.

Os outros 13 pasaxeiros do MV Hondius que foron trasladados ao hospital militar non presentan novidades tras daren negativo na proba PCR. Entre os españois repatriados atópanse cinco persoas de Cataluña, tres de Madrid, tres do Principado de Asturias e unha de Castela e León, outra de Galicia e outra da Comunidade Valenciana.

Aínda que poden comunicarse cos seus familiares a través dos seus móbiles, os pacientes permanecen illados en cuartos individuales, mentres se vixía a súa temperatura dúas veces ao día para detectar precozmente calquera síntoma compatible coa infección.

O Hospital Central da Defensa Gómez Ulla de Madrid reforzou o seu persoal con 90 persoas para asistir aos 14 pasaxeiros españois do cruceiro MV Hondius, que terán que estar en corentena no centro.

Este luns o Ministerio de Sanidade anunciou que a corentena por hantavirus contarase a partir do 6 de maio e estenderase 42 días, é dicir, ata o 17 de xuño.