O Deportivo Abanca supera o Granada cunha gran Ainhoa (2-0)
Ainhoa marcou os dous goles
Partido serio e moi traballado das coruñesas
Homenaxe a Millene polos seus 100 partidos
O Deportivo Abanca arrancou este curto mes de decembro, desde o punto de vista competitivo, cunha vitoria chea de oficio ante o Granada. Cun partido atrapallado no inicio, cheo de dúbidas, ao que souberon sobrepoñerse as galegas.
Co seu oficio e unha boa presión, o Deportivo trazou un partido de roubo e saída no que brillou Ainhoa Martín. Ela protagonizou a acción do primeiro tanto, cunha arrancada desde a medular que encontrou colaboración involuntaria de Ari Mingueza e que a propia Ainhoa acabou por pechar cun regate marabilloso, o máis puro estilo Messi. Minuto 43.
Á volta dos vestiarios, o Granada tratou de ir arriba, xogou os seus mellores minutos e dispuxo de oportunidades, pero aí topou coa figura de Inés Pereira, a gardameta local. E no medio do empuxe nazarí e da incerteza no marcador, un roubo na medular e un balón longo deron co segundo de Ainhoa, para pechar o partido.
Dous a cero final en Riazor, triunfo deportivista que fala de sacrificio, de oficio. E dunha enorme Ainhoa Martín.
