O Congreso suspende a Ábalos dos seus dereitos como deputado tras recibir confirmación do auto de procesamento

A Mesa do Congreso aprobou este mércores a suspensión dos seus dereitos e deberes parlamentarios ao exministro e exsecretario de Organización socialista José Luis Ábalos, despois de que o Tribunal Supremo confirmase o seu procesamento por delitos como organización criminal, suborno ou malversación.

O Congreso recibiu xa a notificación do Tribunal Supremo que confirma o auto de procesamento do exministro José Luis Ábalos, quen se atopa de prisión preventiva desde o pasado 28 de novembro, e este mesmo mércores a Mesa da Cámara aplicará o articulo do regulamento que, dada a súa situación, o suspende dos seus dereitos parlamentarios incluíndo voto e soldo.

O ex secretario de Organización do PSOE pedira este mércores poder exercer o seu dereito a voto desde o cárcere.

Trátase do artigo 21 do regulamento, que sinala que "os deputados e deputadas quedarán suspendidos nos seus dereitos e deberes parlamentarios cando, concedida pola Cámara a autorización obxecto dun suplicatorio e firme o auto de procesamento, se atopen en situación de prisión preventiva e mentres dure esta".

Tras a decisión do xuíz Leopoldo Puente de meter en prisión a Abalos, a Presidencia do Congreso remitiu un oficio ao Supremo para que certificase ese ingreso penal, co fin de poñer en marcha a suspensión do deputado.

Na súa resposta, o Alto Tribunal confirmou que se decretou "a prisión provisional comunicada e sen fianza" para Ábalos, pero tamén subliñou que o auto de procesamento non era firme ao estar recorrido en apelación pola súa defensa, cuxa deliberación se programou para o pasado día 4.

Este mércores a Sala de Apelación do Tribunal Supremo avalou a decisión do maxistrado instrutor de procesar a Ábalos xunto co seu exasesor ministerial Koldo García por presuntas irregularidades nos contratos de máscaras que adxudicou o Ministerio de Transportes durante a pandemia.

E aos poucos minutos o exministro anunciaba na súa conta de X que solicitara que lle deixen votar en remoto en virtude do artigo 82.2 do regulamento da Cámara, que recoñece o suposto de "situacións excepcionais de especial gravidade".

Ábalos destacaba que a norma non especifica o motivo de dita situación excepcional, pero considera que a súa situación de prisión preventiva encaixaría neste suposto. De aí a súa decisión de solicitar o voto telemático en tanto que segue sendo deputado e mantén todos os seus "dereitos, deberes e prerrogativas parlamentarias intactas".

Todo apunta a que non dará tempo a resolver esta cuestión do voto desde o cárcere porque o Congreso xa recibiu a correspondente notificación do Alto Tribunal dando firmeza ao procesamento, co que se aplicará o precepto regulamentario da suspensión.