O Concello do Porriño invita o papa a que visite a terra dos seus antepasados
A carta coa invitación foi entregada por Ángeles Costa, da Fundación DisCamino, durante a audiencia xeral de León XIV en Roma
A familia materna do pontífice procede da parroquia porriñesa de Torneiros
A poucas horas de que León XIV aterre en España, desde o Concello do Porriño lograron facerlle chegar en man unha invitación, para que visite "a terra dos seus antepasados", e un anaco de pedra da localidade.
Ángeles Costa, da Fundación DisCamino, foi quen entregou ao Papa a invitación durante un encontro na súa audiencia xeral, celebrada en Roma o pasado mércores 3 de xuño, un feito do que se fai eco VaticanNews.
"O papa xa ten a nosa invitación, un anaco de pedra do Porriño, un anaco do noso corazón que sabemos que lle chegou", dixo, nunha mensaxe colgada nas súas redes sociais, o rexedor, Alejandro Lorenzo.
O alcalde agradeceu a axuda de Ángeles Costa e de DisCamino nesta misión que "fará posible que o Papa veña aquí, á súa terra".
A León XIV fíxolle moita ilusión o agasallo
A propia Ángeles Costa contou que, antes de entregarllo, díxolle ao papa que o que portaba era "un agasallo das orixes da súa nai" e que a León XIV "fíxolle ilusión".
O agasallo do Concello do Porriño é un monolito de pedra rosa das canteiras da localidade, coa vieira do Xacobeo e o punto quilométrico do municipio dentro do Camino de Santiago.
Xunto a esta ofrenda, o consistorio fixo chegar a León XIV unha carta na que lle expresan a súa admiración e trasládanlle unha invitación formal para que visite O Porriño e "coñeza parte das súas orixes".
A invitación alude ás investigacións desenvolvidas polo cóengo arquiveiro da catedral de Tui, Avelino Bouzón Gallego, que determinou que os antepasados maternos do pontífice proceden da parroquia porriñesa de Torneiros.
