O CIS mantén o PSOE 10,2 puntos por encima do PP, aínda que soben os populares e Vox

O último barómetro de novembro do Centro de Investigacións Sociolóxicas mantén o PSOE como a forza política máis votada nunhas eventuais eleccións, con 10,2 puntos por encima do Partido Popular, aínda que os socialistas caen en estimación de voto mentres soben populares e Vox.

O PP recorta case cinco puntos a distancia co PSOE á vez que amplía a 3,6 puntos a súa vantaxe sobre o partido de Santiago Abascal, consolidado como a terceira formación política máis votada.

A enquisa -a partir de 4.028 entrevistas do 3 ao 12 novembro- concede ao PSOE un 32,6 % en voto estimado (2,2 puntos menos que en outubro), ao PP 22,4 % (2,6 puntos máis) e a Vox, o 18,8 % dos sufraxios (1,1 máis que na anterior mostraxe).

A vivenda e os políticos, principais preocupacións

Entre as principais preocupacións dos cidadáns, a vivenda segue subindo como o maior problema, e xa acumula un 40 % de mencións, aínda que, nun ambiente salpicado de casos de corrupción, os "problemas políticos" escalan á segunda posición (19 %) por encima da inmigración (18,9 %).

Ademais, entre os dez asuntos que máis inquietan aos españois figuran "o Goberno e partidos políticos concretos" (14,1 %, "o mal comportamento dos políticos (12,9 %) e "a corrupción e a fraude" (12,1 %).

Iso si, ao preguntar aos enquisados polos problemas que máis lles afectan persoalmente, destacan os de índole económica (28,1 %), a vivenda (26,8 %) e a sanidade (19,9 %).

Só un 34,1 % dos españois considera que a situación económica xeral é "boa" ou "moi boa" pero a porcentaxe ascende ao 63,9 % cando se lles pregunta pola situación económica persoal.

Sánchez, o preferido como presidente seguido de Abascal

Ao avaliar aos principais líderes políticos, Pedro Sánchez segue sendo o preferido como presidente do Goberno, segundo o 24,5 % dos cidadáns, aínda que baixa case dous puntos, seguido do líder de Vox, Santiago Abascal, con 11 % que supón un punto máis que en outubro e do presidente do PP, Alberto Núñez Feijóo, que sobe medio punto ata o 8,9 % dos entrevistados.

Con todo, ningún dirixente político aproba ao poñerlle nota. Sánchez leva un 4,14 e segue na cabeza, coa dirixente de Sumar Yolanda Díaz en segundo posto cun 3,99, Feijóo en terceiro lugar grazas a un 3,43 e Abascal en última posición (2,98).

O cambio climático preocupa máis que as guerras

O barómetro de novembro tamén revela que o cambio climático inquieta aos cidadáns máis que a guerra en Ucraína ou a crise en Oriente Próximo.

O 71,9 % admite que lle preocupa "moito" ou "bastante" o cambio climático, mentres que a invasión de Ucraína por Rusia ten unha porcentaxe inferior, do 63,7 % e a guerra en Oriente Próximo, do 62,5 %.