O CHUS ofrece selección embrionaria para evitar patoloxías hereditarias

Ter un fillo san, malia padecer unha enfermidade xenética grave. Evitar transmitirlle unha anomalía cromosómica. O CHUS é o único hospital galego que ofrece esta posibilidade, coa cobertura da Seguridade Social, ás parellas en risco de transmitir enfermidades hereditarias. Faino cunha técnica que permite analizar a xenética dos embrións antes da súa implantación no útero materno: a técnica de diagnóstico xenético preimplantacional.

"Naceron xa tres bebés moi sans estes últimos días e van nacer agora outros dous máis e estamos moi contentas porque esta técnica na que levamos traballando dous anos está dando o seu froito", explica Marta Veiga, xinecóloga e coordinadora da Unidade de Reprodución Asistida do CHUS.

Izan é un dos bebés logrados grazas a esta técnica. Naceu sen a enfermidade da súa nai, Carmen, que tiña unha translocación cromosómica que lle descubriron no clínico de Santiago despois do fracaso de tres embarazos. A do meniño é unha vida que só a ciencia fixo posible.

Esquematicamente: a técnica precisa tratamentos de estimulación ovárica e unha fecundación in vitro. Así que o embrión ten cinco días, faise unha biopsia celular, e unha análise xenética, para escoller os embrións que non teñen a patoloxía e implantalos no útero materno.

 "Ademais, imos comprobar que cromosomicamente é normal, é dicir, que non teña a enfermidade que buscamos e tampouco teña outras anomalías, entón cando conseguimos ese embrión san ese é o que imos transferirlle ao útero á súa nai, relata Marta Veiga, coordinadora da Unidade de Reprodución Asistida do CHUS.

Entre as patoloxías que se evitan están a miopatía como a de Steiner, enfermidade Duchamp, poliquistose renal. "Son enfermidades realmente graves entón conseguir que ese bebé que naceu non o teña pois a verdade é que é un éxito", explican.