A Capela celebra a trixésimo quinta edición da súa Festa do Requeixo
O requeixo é un produto galego tradicional, de confección artesá, que ademais ten beneficios para a saúde
O requeixo é un queixo galego fresco que se elabora con leite cru de vaca. Non hai que confundilo co requesón, que se fai a partir do soro do leite e que carece das bondades do requeixo.
"Está considerado un súper alimento. É un alimento con altas propiedades. Ao non pasteurizar o leite, consérvanse todas esas propiedades do pasto e esta bactereoloxía rica que nos fai tanto ben para o organismo", explica Andrea Piñeiro, responsable de Comunicación da Cooperativa Campo Capela.
A Capela leva 35 anos dedicándolle un día de festa ao requeixo para que este produto único de Galicia non se perda e incentivar o seu consumo.
"Sabe a gloria", asegura unha muller.
"Sabe ao leite natural que había antes", puntualiza un home.
"É o queixo que máis me gusta", afirma outra muller.
"Desde que o probei, sempre que teño oportunidade cómproo", conta outra.
"Miña nai facíao sempre", lembra un home.
"Antigamente facíase nas casas. Aínda hoxe faise nalgunhas casas. O que pasa é que hoxe quedan moi poucas vacas e non hai como facelo", lamenta outro.
"Está considerado como un dos alimentos a preservar na arca do gusto de slow food. Se houbese unha catástrofe, sería un dos produtos que nos levariamos para poder sobrevivir", asevera a responsable de Comunicación da Cooperativa Campo Capela.
