O Celta cambia o céspede de Balaídos por cuarta vez desde o verán
Na Sede están pendentes de contabilizar o gasto total dos catro cambios de céspede, pero a cifra podería aproximarse aos 1,5 millóns de euros
Balaídos bate récords da estrea de céspede nunha tempada despois de que o Celta teña que cambiar a alfombra verde por cuarta vez desde o pasado verán.
Os problemas que arrastra a instalación tras danarse o sistema de drenaxe durante o concerto de Guns N’Roses en xullo pasado, obrigaron a substituír novamente os tepes de herba que foran colocados a principios de xaneiro.
Vinte e dous días e tres partidos de competición aguantou o anterior céspede híbrido. Para a nova alfombra, o club recorreu a un viveiro de Portugal e adquiriu herba natural que xa está instalada para estrearse o sábado 17 de febreiro con motivo da visita do Barcelona, no partido correspondente á vixésimo quinto xornada de LaLiga.
Na Sede están pendentes de contabilizar o gasto total dos catro cambios de céspede pero a cifra podería aproximarse aos 1,5 millóns de euros, tendo en cuenta que os tepes híbridos (80 por cento de herba natural e o resto sintética) podería rozar os 400.000 euros por cada unha das tres veces que se instalou en Balaídos no que vai de tempada. Para os tepes de herba natural, os custos aproxímanse aos 240.000 euros por campo.
A estrea da nova alfombra producirase dentro de dez días, pois o Celta xoga esta semana en Xetafe e a próxima recibirá ao Barcelona.
