O Bribón non chega a tempo a Sanxenxo e Xoán Carlos I non pode competir no Desafío Barceló
O rei saíu ao mar nunha embarcación de apoio con parte da tripulación coa que conquistou o Mundial da Clase 6 Metros no mes de setembro, en Nova York
O Bribón ía chegar ao porto de Vigo este venres pero o mal tempo atrasou a navegación e non arribará ata o luns
Juan Carlos I este sábado en Sanxenxo. Foto: EFE/Emilio Lavandeira
Xoan Carlos I non compite no Desafío Barceló, a última proba da Liga Nacional da Clase 6 Metros desta tempada, ao non dispoñer do seu barco, o Bribón.
O rei emérito saíu ao mar nunha embarcación de apoio con parte da tripulación coa que conquistou o Mundial da Clase 6 Metros no mes de setembro, en Nova York.
O motivo de que o Bribón non cheguera a tempo para a competición son as duras condicións meteorolóxicas rexistradas esta semana. O buque portacontedores MSC Kayla, que transporta tanto o Bribón como o Titia desde os Estados Unidos ata Vigo, sufriu un atraso e atópase actualmente en Xixón.
O veleiro tiña previsto arribar ao porto de Vigo este venres, á unha da mañá, pero a súa ETA (siglas en inglés de Estimated Time of Arrival), a hora de chegada estimada pospúxose ata o vindeiro luns.
A tripulación de Titia si compite, faino a bordo do seu segundo barco, Acacia, mentres que a tripulación do Bribón aproveita para axudar a outros equipos para mellorar a súa posta a punto e manobras, como é o caso do Stardust, que para o Desafío Barceló contará co campión olímpico e catro veces campión do mundo de 6 metros, o cántabro Jane Abascal.
O Desafio Barceló comezou a primeira hora desta tarde, ás 13:00 horas, co barco do Monte Real Club de Iates de Baiona, o Alibaba II de Miguel Lago, como máximo favorito ao triunfo da derradeira proba do ano.
Juan Carlos I no Náutico de Sanxenxo, este sábado. Foto: EFE/Emilio Lavandeira
