O Banco Sabadell nomea conselleiro delegado a Marc Armengol

O consello de administración do Banco Sabadell propón o nomeamento de Marc Armengol, máximo responsable da súa filial TSB, como conselleiro delegado do Grupo Banco Sabadell, en substitución de César González-Bueno, que deixa as súas funcións ao considerar que é un bo momento para o relevo.

A Comisión Nacional do Mercado de Valores informou que Armengol será o primeiro executivo do Banco Sabadell, previsiblemente a partir de maio, unha vez que se celebre a xunta de accionistas e recibidas as autorizacións preceptivas por parte do Banco Central Europeo (BCE). O consello de administración do Sabadell valorou a profunda transformación da entidade impulsada por César González-Bueno e o forte crecemento dos resultados, que tivo o seu reflexo na evolución da cotización das accións de Banco Sabadell.

Sobre Marc Armengol, o máximo órgano de xestión do Sabadell salientou a súa capacidade de liderado e xestión no ámbito nacional e internacional, amosada nas numerosas posicións de responsabilidade que ocupou na entidade ao longo dos últimos 25 anos.