O aniversario da invasión rusa de Ucraína remata sen indicios de proximidade da paz
Moscova incrementou os ataques no leste pero Kíiv mantén posicións
Os rusos intensificaron os ataques en todas as frontes do leste, con aviación e artillería. Aseguran que nas últimas horas causaron 450 baixas, entre mortos e feridos, nas filas ucraínas. Os mercenarios do grupo Wagner presumen ademais de capturar unha poboación de 300 habitantes a só catro quilómetos de Bahmut.
Zelenski xa dixo esta semana que a defensa de Bahmut é importante pero que non a farán a calquera prezo, polo que non se descarta que se repreguen e preparen logo unha contraofensiva.
Xa son varios os países de Occidente que decidiron ampliar o número de tanques de combate que lle van enviar a Kíiv. Os Estados Unidos tamén anunciaron outro paquete de axuda militar. Biden, porén, rexeitou de momento mandar os cazas que quere Zelenski. O norteamericano asegurou que non é o que necesitan agora.
No terreo diplomático, a maioría dos ministros de Economía do G-20, reunidos na India, condenaron a invasión rusa, pero o grupo non deu feito un comunicado conxunto pola negativa de Rusia e a China a usar o termo guerra.
Mentres, en distintos puntos do mundo, milleiros de cidadáns saíron ás rúas para reclamar a paz en Ucraína, pero cumprido o ano de guerra a posibilidade de diálogo entre as partes mantense lonxe.
