O 2025 foi o terceiro ano máis cálido, cunha temperatura media de 14,97 ºC

O 2025 foi o terceiro ano máis cálido xamais rexistrado, despois dos valores acadados en 2023 e 2024. A temperatura media foi de 14,97 °C,  0,59 °C por riba da media do periodo 1991-2020 e 0,13 °C por baixo de 2024, o ano máis cálido de toda a serie histórica.

Os expertos avisan: en dez anos poderiamos chegar aos 1,5º de quecemento global, o limiar a partir do cal aumentan significativamente os riscos para os sistemas naturais e humanos. Son algunhas das conclusións do informe que este mércores publica o Centro Europeo de Previsións Meteorolóxicas a Prazo Medio que xestiona o Servizo de Cambio Climático e o Servizo de Vixilancia Atmosférica de Copernicus.

 "A atmosfera está a enviarnos unha mensaxe e debemos escoitala"

Durante 2025, a metade da superficie terrestre mundial experimentou unha tensión térmica intensa máis días do normal, con temperaturas por riba dos 32 ºC que contribuíron á propagación de incendios forestais e de emisións tóxicas que degradaron significativamente a calidade do aire e tiveron efectos potencialmente nocivos para a saúde humana.

A temperatura da superficie do mar situouse nos 20,73º, a máis cálida tras os niveis récord de 2024 e 2023. A Antártida rexistrou a súa temperatura anual máis cálida e a extensión mensual do xeo mariño foi a máis baixa rexistrada para a época do ano en xaneiro, febreiro, marzo e decembro.

Os expertos advirten: o nivel actual de quecemento global a longo prazo estímase xa en 1,4 ºC e calcúlase que a finais desta década poderiamos chegar aos 1,5 °C. A partir deste limiar aumenta o risco de producirse todo tipo de catástrofes naturais.

As causas destas temperaturas excepcionais hai que buscalas na actividade humana, que segue a ser un factor dominante que contribúe a este quecemento global.

A directora do Servizo de Vixilancia Atmosférica de Copernicus no ECMWF, Laurence Rouil, é clara:  "A atmosfera está a enviarnos unha mensaxe e debemos escoitala", afirma. "Seguiremos realizando un seguimento dos gases de efecto invernadoiro, os aerosois e outros indicadores atmosféricos para axudar aos responsables da toma de decisións a comprender os riscos de continuar coas emisións".