A policía volve intervir no barrio coruñés da Sagrada Familia por unha ameaza de acoitelamento

Pasaban poucos minutos das oito da mañá deste martes cando algúns veciños do barrio da Sagrada Familia volvían presenciar unha nova lea.

"Aquí, a escasos metros do piso este. A verdade é que non temos moi claro que fose de aí, pero había dúas parellas discutindo e un home ameazou outro con acoitelalo", relata unha testemuña.

Unha das persoas que presenciou o incidente non tardou en chamar a policía. Primeiro chegaron axentes da Local e, pouco despois, da Nacional.

"Viñeron, fixeron a intervención... Había tres ou catro coches de policía e identificaron os implicados. Pero non atoparon coitelo nin nada".

Porén din estar fartos de vivir episodios similares cada poucos días.

"O anterior creo que foi o venres da semana pasada. Aquí cada tres ou catro días, como moito, soe pasar algo. Estes días si hai máis presencia policial e parece que se están cortando un pouco máis, pero tampouco sabemos se será a calma que precede a treboada, ou se se está conseguindo suavizar o tema".

No barrio sinalan unha vivenda como a orixe do problema que sofren. Din que aí venden droga barata e que acode moita xente a mercar e mesmo consumir.

"O piso está como fumadeiro. Aí xa lles preparan a droga e déixanlles consumir dentro. Ven xente de fóra e que o que veña desesperado rouba o que atopa". "A min onte roubáronme a carteira. E, si, dá medo".

Por iso queren que alguén tome cartas no asunto e acheguen unha solución definitiva.