Non somos todos iguais ante a inxestión de alcohol
A súa metabolización depende de moitos factores, un deles o peso corporal
A nova taxa de alcoholemia que entrará en vigor en breve sitúase no 0,2
Que o consumo de alcol lle afecta a todo o mundo é unha certeza.
"Altera a visión xeral das cousas aínda que bebas pouco. Sempre é un risco", comenta unha muller.
Pero non afecta a todos por igual, hai diferentes factores, un deles o peso, que inflúe no xeito de como o corpo o metaboliza.
"Eu teño amigos que bebían catro copas e ían tan tranquilos e eu se bebo media xa vou un pouco piripi", apunta un rapaz.
"Cando non como séntame bastante mal, a verdade", conta unha moza.
Comer sempre axuda.
"Inxerilo con comida fai que o baleirado gástrico sexa máis lento e fai que se absorba máis lentamente aínda que todo o alcohol se acaba absorbendo", explica Iván Fernández, médico internista no CHUS.
E por que as mulleres o toleran peor?
"Creo que beben menos", opina un señor.
Beber menos tamén axuda, pero a resposta está na porcentaxe de auga que temos no corpo.
"Fai que a mesma cantidade de alcol dea maior taxa de alcolemia nas mulleres que teñen menos porcentaxe de auga que nos varóns, por exemplo", continúa o médico.
Os maiores tamén teñen menos cantidade de auga polo que o alcohol se tolera peor, ademais de que os órganos tampouco funcional igual.
"A capacidade de metabolización do alcohol non é a mesma con 20 anos que con 65".
A falta de actividade tamén provoca unha absorción máis lenta.
"O metabolismo do etanol é máis lento, e iso fai que se te botas a durmir é máis problable que sigas dando positivo á mañá seguinte", conta Iván Fernández.
"É adestramento, ao final canto máis bebes máis vas tolerando o alcohol", comenta unha rapaza.
É importante desterrar ideas coma esta e concienciarnos que a única taxa segura para conducir é:
"Non beber, que é o que eu vou decidir sempre", conclúe un mozo.
