Maduro declárase inocente: "Son o presidente de Venezuela. Considérome un prisioneiro de guerra"

O presidente de Venezuela, Nicolás Maduro, e a súa esposa, Cilia Flores, declaráronse este luns non culpables de todos os cargos aos que se enfrontan ante o tribunal do Distrito Sur de Nova York durante a súa primeira comparecencia. Maduro dixo que segue sendo o presidente de Venezuela e que "é un prisioneiro de guerra". 

Ao principio da audiencia, preguntado polo xuíz federal Alvin Hellerstein, de 92 anos, o mandatario presentouse en español como o presidente de Venezuela e asegurou que se atopaba "secuestrado" nos Estados Unidos.

"Son o presidente de Venezuela e considérome un prisioneiro de guerra. Fun capturado na miña casa en Caracas", afirmou Maduro durante a vista.

"Son inocente. Non son culpable. Son un home decente", declarou Maduro preguntado no tribunal.

O líder venezolano asegurou non ver a súa acusación antes de comparecer no tribunal e descoñecer os seus dereitos. Pouco despois, Flores declarouse "non culpable, completamente inocente".

Por outra banda, os letrados solicitaron atención médica para ambos porque, segundo dixeron, teñen "problemas de saúde".  letrado Mark Donnelly afirmou que Flores "sufriu lesións importantes durante os seus secuestro" e suxeriu que podería ter unha fractura ou contusións graves nas costelas.

Barry Pollack, o avogado  de Maduro, afirmou no tribunal de Nova York que "polo momento non solicitará la liberdade baixo fianza" para o mandatario, aínda que non descartou facelo máis adiante. Pollack cuestionou a "legalidade da abdución militar" do seu cliente, xa que se trata do "xefe dun Estado soberano e ten dereito ao privilexio" do seu cargo. 

Pollack é un letrado de alto perfil coñecido por clientes como Julian Assange, a quen defendeu no caso Wikileaks.

A acusación en contra de Maduro por delitos relacionados con narcotráfico, presentada orixinalmente en 2020, foi ampliada para incluír á súa esposa e engadir máis cargos. Os novos cargos acúsannos de conspiración por narcoterrorismo, conspiración para importar cocaína, conspiración para a posesión de metralladoras e artefactos destrutivos e conspiración para usar esas armas.

A súa esposa está sinalada por presunta implicación na coordinación de reunións e a loxística da rede. Cilia Flores ten un avogado distinto, Mark Donnelly, cofundador da firma Parker, Sanchez & Donnelly e que traballou 12 anos no Departamento de Xustiza e 8 como fiscal nun condado de Houston.

A segunda sesión do xuízo terá lugar o próximo 17 de marzo. 

O presidente de Venezuela chegou este luns xunto á súa esposa, ao tribunal federal do sur de Nova York, en Manhattan, para comparecer por primeira vez ante un xuíz  tras ser capturado o pasado sábado en Caracas e trasladado posteriormente aos Estados Unidos.

Maduro e Flores foron trasladados desde a prisión federal Metropolitana de Brooklyn ata un campo nos arredores da cidade, desde onde foron introducidos nun helicóptero que os trasladou ata un heliporto próximo ao tribunal federal do sur de Nova York. A aeronave aterrou minutos despois nas inmediacións do edificio xudicial.

Posteriormente, ambos foron conducidos nun convoi composto por cinco vehículos e baixo unha forte escolta policial ata o tribunal, segundo imaxes difundidas por medios estadounidenses. A policía, mentres tanto, mantiña cortadas varias rúas nos arredores durante o operativo de seguridade.

Maduro, custodiado por axentes da Axencia Antidroga dos EUA (DEA, polas súas siglas en inglés), descendeu con moita dificultade e tivo que ser axudado polos axentes para subir a un vehículo blindado que o conduciu ata o xulgado.

Caso mediático

aAfigura de Maduro atraeu a atención de xornalistas de todo o mundo, pero tamén de ducias de venezolanos e cubanos asentados en Nova York.

"Queremos ver historia cos nosos propios ollos", conta a EFE Nelia, unha venezolana que veu visitar a Nova York á súa filla, Cristina, unha avogada de inmigración.

Ambas esperaron horas nos corredores recubertos de mármore do tribunal do Distrito Sur de Nova York para ver a primeira vista de Maduro.

Fronte ao tribunal houbo dous grupos reducidos de manifestantes: un formado por venezolanos celebrando a captura e outro grupo, maiormente de estadounidenses, contra a intervención militar da Administración Trump.