Minuto de silencio nos concellos galegos en sinal de dó polas vítimas do accidente de Urda

Concellos de toda Galicia sumáronse este mércores á convocatoria da Federación Española de Municipios e Provincias (Femp) para celebrar un minuto de silencio en solidariedade e apoio coas vítimas do accidente ferroviario ocorrido na localidade toledana de Udra.

Así, na capital galega, decenas de persoas concentráronse fronte ao Pazo de Raxoi. Entre os asistentes, alén da alcaldesa, Goretti Sanmartín, tamén participaron o conselleiro de Educación, Román Rodríguez, o de Sanidade, Antonio Gómez Caamaño, a de Mar, Marta Villaverde, o de Medio Ambiente, Nicolás Vázquez, o delegado do Goberno, Pedro Blanco, a portavoz nacional do BNG, Ana Pontón, a secretaria xeral do PPdeGalicia, Paula Prado, o secretario xeral de Sumar, Paulo Carlos López, e a reitora da USC, Rosa Crujeiras, alén de deputados e concelleiros.

Ao finalizar o minuto de silencio, que concluíu cun aplauso dos asistentes, a rexedora da capital galega sinalou que Santiago ten "o corazón nun puño", lembrando o accidente de Angrois.

"Aínda transcorrido tanto tempo despois da desgraza de Angrois, Santiago continúa chorando e sentindo que o corazón se lle encolle cada vez que ocorre un accidente ferroviario", remarcou despois de asegurar que "ninguén máis que Santiago pode entender hoxe o sentimento que ocorre en distintas poboacións do Estado español polo accidente ferroviario de Toledo".

Tamén se sucederon os minutos de silencio en numerosos concellos galegos que secundaron a convocatoria da Femp. No de Pontevedra participou o presidente da Xunta, Alfonso Rueda. Pola súa banda, o secretario xeral do PSdeG, José Ramón Gómez Besteiro, asistiu ao de Lugo.

Así mesmo, para este xoves tamén está previsto que Galicia acolla diferentes minutos de silencio en memoria das vítimas do accidente ferroviario. Entre outros, ás 12.00 horas terá lugar unha homenaxe no Parlamento de Galicia, na sede da Xunta en San Caetano e na Delegación do Gobierno na Coruña.

Ademais, nas estacións de tren da comunidade galega gardaranse cinco minutos de silencio, convocados polo comité de empresa de Renfe.