Decretan segredo de sumario, prohibición de acceder á zona e incautación das caixas negras dos trens
Decretan segredo de sumario, prohibición de acceder á zona e incautación das caixas negras dos trens
Forzas e Corpos de Seguridade do Estado, equipos de salvamento e persoal xudicial son os únicos que teñen autorización para permanecer no lugar do accidente
O obxectivo é esclarecer os feitos e preservar as evidencias, probas e indicios
EFE/Ismael Herrero
A titular da praza número 2 da Sección Civil e de Instrución do Tribunal de Instancia de Orgaz (Toledo) ditou providencia na tarde deste mércores pola que se acorda a prohibición de acceso a toda persoa allea á zona do sinistro do accidente ferroviario de Urda.
A prohibición alcanza 2 quilómetros da vía de alta velocidade Madrid-Sevilla en ambos os sentidos.
Forzas e Corpos de Seguridade do Estado, equipos de salvamento e sanidade e persoal xudicial son os únicos que conta coa autorización xudicial para permanecer na zona, segundo o comunicado do Tribunal Superior de Xustiza recollido por Europa Press.
Prohibido retirar elementos e difundir imaxes da zona afectada
Na mesma providencia, prohíbese a retirada de calquera elemento, así como a toma e difusión de imaxes da zona afectada.
A decisión da xuíza instrutora prodúcese co fin de esclarecer os feitos e preservar as evidencias, probas e indicios, explica o comunicado.
Outro dos acordos da xuíza instrutora durante a tarde foi a incautación e custodia por parte da Policía Xudicial de Toledo das caixas negras dos trens sinistrados que se atopen, para a súa posterior análise.
Solicitouse un informe sobre as persoas encargadas do control de mando
Ademais, a xuíza instrutora dictou que a Policía Xudicial compareza no centro de control de Atocha para solicitar datos relativos á circulación de trens na zona do sinistro e solicitou un informe da comisión de investigación de ADIF sobre as persoas encargadas do control de mando no momento do accidente.
Doutra banda, oficiouse á Policía Xudicial de Toledo para solicitar datos de ADIF relacionados con protocolos de actuación relativos aos minutos previos, no momento do sinistro, e posteriores ao accidente ferroviario.
Finalmente, ditouse Auto polo que se acorda o segredo de sumario das actuacións.
Por outra banda, o Tribunal Superior de Xustiza de Castela-A Mancha (TSJCLM) activou o protocolo nacional de actuación médico-forense e de policía científica en sucesos con vítimas múltiples.
