Milleiros de persoas maniféstanse contra Trump nos Estados Unidos
O movemento No Kings convocou máis de 3.300 concentracións en todo o país
Condenan o "autoritarismo" que perciben no segundo mandato do presidente
Manifestación en Boston. REUTERS/Brian Snyder
Terceira xornada de protestas do movemento No Kings nos Estados Unidos, con máis de 3.300 concentracións convocadas contra Donald Trump, a guerra de Irán e o Servizo de Inmigración e Aduanas (ICE).
A coalición duns 400 grupos, como Amnistía Internacional, Indivisible, sindicatos e a Unión de Liberdades Civís Estadounidenses (ACLU), prevé superar as dúas anteriores edicións e conseguir a maior mobilización ata o de agora.
A de outubro pasado reuniu 7 millóns de asistentes en 2.700 eventos, e na de xuño de 2025 participaron 5 millóns de manifestantes en 2.100 lugares.
As marchas, nos 50 estados do país, condenan o "autoritarismo" que perciben no segundo mandato do presidente Trump, en particular polos abusos do ICE e os operativos migratorios.
Tamén rexeitan a "guerra ilegal" do presidente estadounidense en Irán, que xusto este sábado fai un mes.
"Os estadounidenses están fartos deste caos constante, e están listos para unirse en solidariedade contra os actos excesivos e atroces da Administración de Trump contra as familias traballadoras e os inmigrantes", expuxo a coalición nun comunicado antes da marcha.
Concentración principal
Minnesota, onde o ICE e a Patrulla Fronteiriza mataron en xaneiro a Renee Good e Alex Pretti, dous cidadáns estadounidenses, acolle a concentración principal. O seu asasinato agudizou a indignación nacional contra os operativos migratorios do republicano.
As manifestacións prodúcense cando a desaprobación a Trump alcanza o maior nivel dos seus dous mandatos. Segundo revela unha enquisa de Fox News publicada o mércores, un 59% da poboación reproba a súa xestión.
