Medra a alarma social polas picadas despois de dúas denuncias na Coruña e Vigo
Medra a alarma social polas picadas despois de dúas denuncias na Coruña e Vigo
Unha moza da Coruña desmaiouse ao saír dunha discoteca e atopou unha marca sospeitosa no nocello
O concello de Cambados desmente que houbera picadas nos concertos do Albariño
A policía investiga o caso dunha moza que se desmaiou á saída dunha discoteca na Coruña e atopou despois unha marca sospeitosa no nocello. Mentres se esclarecen os feitos e a intención das picadas, esténdese o medo. Onte saltaron as alarmas nun concerto das Festas do Albariño.
"Dicían que picaran as mulleres e que houbera desmaios", comentan os veciños pola rúa.
O Concello desmente que houbese picada ningunha, confirma que non hai denuncias na zona e fala dunha noticia falsa. Confirman que houbo desmaios, pero motivados pola calor, as colas de espera e os nervios, ningún con síntomas compatibles coa submisión química.
"Xerouse unha histeria colectiva ao ver o bulo nas redes, nerviosismo que derivou en que os servizos de asistencia atenderan vinte persoas, pero máis pola ansiedade e por lipotimias", explica o alcalde Samuel Lago.
Ademais da moza coruñesa, en Vigo investígase tamén a denuncia dunha muller que se desmaiou despois de sentir unha picada no brazo nas festas da Praia América. A analítica xa determinou que non había restos tóxicos no sangue.