Marta Rivera de la Cruz será a número 2 da lista de Feijóo ao Congreso

A ata o de agora conselleira de Cultura da Comunidade de Madrid, escritora e xornalista Marta Rivera de la Cruz será a número dous na lista do PP por Madrid ás eleccións xerais que encabezará o líder do partido, Alberto Núñez Feijóo.

Fontes da formación confirmaron o posto que ocupará na candidatura ao Congreso e resaltaron que Rivera de la Cruz, que no seu día militou en Ciudadanos, "reforza o compromiso de Feijóo pola Cultura" nunha lista na que tamén estarán perfís vinculados ao sector, como son Borja Sémper e Jaime de los Santos.

Moi próxima á presidenta madrileña, Isabel Díaz Ayuso, a conselleira de Cultura en funcións chegou á política da man de Albert Rivera en 2015, cando foi elixida deputada por Madrid no Congreso.

Foi fichada despois, tras as eleccións autonómicas de 2019, como conselleira de Cultura e Turismo no Goberno de coalición de PP e Cs na Comunidade de Madrid, en representación da formación laranxa.

Cesada, en marzo de 2021, do mesmo xeito que o resto de conselleiros de Cs, tras o adianto electoral decretado por Ayuso, foi reelixida, en xuño, para a mesma carteira, á que ademais sumaba Deportes. Un mes antes, e tras a desaparición de Cs do panorama político madrileño, deuse de baixa nesta formación.

En abril deste ano foi confirmada a súa inclusión como número tres na lista do PP xunto ao alcalde, José Luis Martínez Almeida, para as pasadas eleccións municipais do 28M.

Nada en Lugo en 1970, Marta Rivera é licenciada en Ciencias da Información e especialista en Comunicación Política pola Universidade Complutense. Descendente dunha familia de xornalistas, traballou en distintos medios de comunicación audiovisuais e escritos e desenvolveu unha longa carreira como novelista. 

Feijóo inclúe nas listas ao Congreso aos seus colaboradores máis próximos

O presidente do PP incorporou nas listas do partido ás eleccións do próximo 23 de xullo ao Congreso aos seus colaboradores máis próximos, que chegaron con el de Galicia, como a súa directora de Gabinete, Marta Varela; ou a responsable da área de Proxección e Imaxe, Mar Sánchez.

Así figura na relación completa de candidaturas dos populares ao Congreso e ao Senado aprobadas este mércores polo Comité electoral do partido, seguindo o criterio de "incluír a persoas que contan cunha extensa traxectoria política" así como "unha contrastada experiencia en xestión pública e no sector privado", segundo informou o PP.

Destaca a incorporación de veteranos como Manuel Cobo (número 7), Carlos Aragonés (número 9), ademais de Mar Sánchez, que figura en posto de saída en décima posición, mentres que Marta Varela vai en quinto lugar.

Cobo foi a man dereita de Alberto Ruiz-Gallardón durante anos e Aragonés foi xefe de Gabinete de José María Aznar. Xunto a eles, no cuarto lugar da lista, está a expresidenta da Asemblea de Madrid Eugenia Carballedo. Pecha a candidatura de Madrid o alcalde da capital, José Luis Martínez-Almeida.

No Senado, onde as listas son abertas, sitúase en primeiro lugar da lista de Madrid o vicesecretario de Coordinación Autonómica e Local do PP, Pedro Rollán.

O actual portavoz do grupo popular na Cámara Alta, Javier Maroto, non figura en ningún lista pero cando se constitúa o Senado o próximo 17 de agosto continuará como senador porque ocupa o escano designado polo Parlamento de Castela e León.

Ademais, o ata o de agora senador Carlos Floriano, outro veterano das filas do PP, pasa a unha candidatura ao Congreso como número 2 por Cáceres.

A voltas cos debates

Nadia Calviño insiste en manter un debate que os populares esquivan. "Como é que non explica cal vai ser a súa política económica? Como é que non presenta o seu equipo de goberno?", pregúntase a vicepresidenta primeira e ministra de Asuntos Económicos.

Respondeulle Alberto Núñez Feijóo botándolle en cara que "Nadia Calviño non se presenta a estas eleccións"

Dese debate séntese excluída a líder de Sumar. Para Yolanda Díaz, non se trata de "nadie ou Nadia". Pero Calviño argumenta e asegura que "o socio minoritario non tivo influencia na política económica" da coalición.

Pacto con Vox na Comunidade Valenciana

Máis alá das listas e dos debates, tamén se fala dos pactos, en concreto, do asinado na Comunidade Valenciana entre PP e Vox. De non asinarse, di o presidente do Partido Popular, "a única posibilidade sería convocar eleccións de novo xa que o PSOE non quixo apoiar a quen gañou as eleccións".

Pero os socialistas non aforraron en críticas. Para María Jesús Montero, ministra de Facenda, "lonxe dunha liña vermella, póñenlle unha alfombra vermella" e considera que "PP e Vox preséntanse baixo o mesmo ticket electoral".

Segundo Margarita Robles, ministra de Defensa, Alberto Núñez Feijóo "quere para España un goberno do PP con Vox".O presidente do PP, pola súa banda, asegura que o seu obxectivo é "conseguir unha maioría suficiente para gobernar" e non pactar con Vox.