Máis de 60.000 persoas maniféstanse en Berlín contra o xenocidio en Gaza
É unha das maiores mobilizacións que tiveron lugar en Alemaña dende que comezou a ofensiva israelí na Franxa
Manifestantes na porta de Brandenburgo. REUTERS/Christian Mang
Milleiros de persoas participaron este sábado en diversas protestas contra o xenocidio en Gaza convocadas en Berlín por varias organizacións da sociedade civil, nunha das maiores mobilizacións que tiveron lugar en Alemaña desde que empezou a ofensiva israelí sobre o enclave.
Segundo cifras da Policía, ata 60.000 persoas estiveron na marcha principal, unhas 100.000 de acordo cos datos que manexan os colectivos convocantes.
A voceira da Policía, Anja Dierschke, asegurou que a manifestación desenvolveuse de xeito "absolutamente pacífico". Porén, as forzas de seguridade tiveron que disolver unha protesta secundaria no barrio de Kreuzberg tras rexistrárense incidentes.
Houbo casos de resistencia á autoridade, lesións, uso de obxectos pirotécnicos non autorizados e de símbolos anticonstitucionais, polo que se produciron varias detencións.
Récord de participantes
Os organizadores da marcha principal deste sábado, unha plataforma que agrupa varias ONG, activistas e a comunidade palestina, marcaran como obxectivo bater un récord de participantes.
"Sacamos ás rúas a opinión maioritaria da poboación e enviamos un sinal claro a Friedrich Merz e ao Goberno: a fin de todos os acordos armamentísticos con Israel, a presión a través de sancións e o recoñecemento de Palestina deberon darse hai tempo", declarou a líder da Esquerda Ines Schwerdtner, segundo un comunicado, ao termo da marcha.
Xa en xuño congregáranse en Berlín ata 50.000 manifestantes por Gaza, segundo cifras dos convocantes, aínda que naquela ocasión a Policía mencionara un número moito menor.
Os participantes corearon lemas como "Palestina libre!" ou "Viva Palestina!" e portaron maioritariamente bandeiras palestinas e pancartas con slogans como "SOS Gaza".
Alto ao fogo
O manifesto da convocatoria reclamáballe ao Goberno alemán que abandone todo tipo de cooperación militar con Israel e que empregue "todas as medidas posibles" para lograr un cesamento do fogo inmediato e a entrada de axuda humanitaria en Gaza.
