O Goberno de Hamás acusa a Israel de violar 500 veces o alto o fogo en Gaza

Israel violou 497 veces o último cesamento do fogo en Gaza, auspiciado polos Estados Unidos e que entrou en vigor o 10 de outubro, segundo comunicou nas últimas horas o Goberno de Hamás na Franxa.

De acordo con este reconto, 27 deses incumprimentos á tregua producíronse este sábado, cando unha nova vaga de ataques israelís no enclave palestino matou 24 persoas e feriu outras 87.

"Condenamos nos termos máis enérxicos as continuas e graves violacións sistemáticas do acordo de cesamento do fogo por parte das autoridades de ocupación israelís", declarou a oficina política de Hamás nun comunicado.

Desde que se rubricou o cesamento do fogo hai 44 días, o Goberno de Gaza contabiliza a morte de 342 civís –a maioría, menores, mulleres e anciáns–, 875 persoas feridas e 35 detencións arbitrarias durante incursións e redadas máis aló da chamada liña amarela.

A liña amarela é a demarcación imaxinaria á que se retiraron as tropas israelís (aínda dentro de Gaza) ao entrar en vigor a tregua. Entre esta zona e as fronteiras da Franxa con Israel e con Exipto, todo o perímetro, máis do 50% do enclave, está baixo control militar do Exército.

Violacións da tregua

Segundo a desagregación do Goberno de Gaza, neste mes e medio houbo 142 tiroteos contra poboación civil, vivendas, barrios residenciais e tendas de campaña de familias desprazadas; 21 incursións de vehículos en zonas residenciais e agrícolas cruzando a liña amarela; 228 bombardeos terrestres, aéreos e de artillería; e 100 demolicións de vivendas e infraestrutura civil.

Hamás acusa a Israel de vulnerar a tregua "con pretextos falsos" e insta os mediadores —os Estados Unidos, Exipto e Qatar— a "intervir urxentemente e presionar para deter estas violacións de inmediato".

"Responsabilizamos a ocupación plenamente de todas as repercusións humanitarias e de seguridade derivadas destas violacións, e afirmamos que a súa continua agresión minará calquera esforzo internacional por manter a calma", engade no comunicado.

Pola súa banda, a oficina do primeiro ministro israelí, Benjamín Netanyahu, xustificou as últimas intervencións polo ataque contra os seus soldados dun suposto combatente de Hamás que cruzou a liña amarela.

"En resposta, Israel eliminou cinco combatentes de alto rango de Hamás", asegurou.

Desde que Israel comezou a súa ofensiva militar por mor dos ataques de Hamás do 7 de outubro de 2023, morreron por fogo hebreo un total de 69.733 gazatís (entre eles, máis de 20.000 menores) e 170.863 quedaron feridos, de acordo co Ministerio de Sanidade de Gaza.