Macron rexeita a dimisión do ministro do Interior e pide máis medidas contra os violentos

O presidente francés Emmanuel Macron rexeitou a dimisión do ministro do Interior Laurent Nuñez tras os disturbios do sábado en París e outras cidades de Francia e pediulle que despregue canto antes novos métodos de intervención contra os grupos violentos, informou este luns o Elíseo.

A Presidencia francesa xustificou a decisión pola necesidade de garantir a continuidade do mando das forzas de seguridade no actual contexto de tensión. "Dada a necesidade de manter o mando das forzas da orde no contexto actual, o presidente da República rexeitou a renuncia de Nuñez", indicou o Elíseo. Nunha entrevista en France Inter, Nuñez explicou que presentara a súa dimisión a Macron porque, dixo: "Son responsable de todo o que está a ocorrer".

Macron volveu reclamar transparencia sobre os fallos de previsión e de intelixencia que, segundo a Presidencia francesa, contribuíron aos disturbios, ás desfeitas e aos saqueos de centos de comercios. O ministro presentara a súa dimisión despois das críticas á xestión policial das protestas do 17 de outubro, que derivaron en actos vandálicos e enfrontamentos en distintas cidades francesas.

O reconto polas autoridades ascende a unhas 2.400 detencións e preto dun milleiro de membros das forzas de seguridade feridos. A actuación policial tamén recibiu críticas de varios alcaldes, entre eles os de París, Marsella e Limoxes, cuxa Alcaldía foi pasto das chamas. Ante a magnitude dos danos, Macron pediu a Nuñez que aplique canto antes sobre o terreo novos métodos de actuación contra os responsables dos disturbios, dixo o Elíseo.

O ministro de Interior recoñeceu hoxe que a despregadura policial que executou era, nalgúns aspectos, asimétrica en relación co volume de participantes, xa que a participación foi claramente maior do que se previra, explicou.

Nuñez admitiu que se producira unha perda de control por parte da policía nalgunhas cidades. Os seus prognósticos estimaban 200.000 manifestantes para o sábado, mentres que a cifra final foi de 500.000. "É probable que tamén se subestimase o número de vándalos e saqueadores, e tamén a presenza de activistas de extrema esquerda", engadiu.

O ministro precisou que o sábado se mobilizaron sesenta mil persoas, entre elas todas as forzas móbiles, xendarmes e axentes de policía. "A cuestión agora é como garantir que isto non volva ocorrer", subliñou. Nunha declaración solemne televisada o domingo pola noite, o presidente advertiu de que quen intentou atacar as institucións republicanas terían que responder polos seus actos ante a xustiza e apuntou como responsables das violencias e saqueos a grupos de ultraesquerda e a delincuentes.