Lores aproba por 98,6 millóns os seus orzamentos municipais de 2025 co apoio do PSOE

O goberno do BNG no Concello de Pontevedra, dirixido por Miguel Anxo Fernández Lores, aprobou o orzamento municipal para 2025, por 98,6 millóns de euros, co voto a favor do PSOE. O Partido Popular rexeitou as contas.

O concelleiro de Facenda Raimundo González Carballo destacou a boa situación económica do Consistorio, cunha débeda de algo máis de seis millóns de euros, nun municipio que leva once anos seguidos con todas as súas taxas e impostos conxelados e que se sitúa entre os concellos con menos presión fiscal de España.

Tamén defendeu que este orzamento permitirá destapar o río dos Gafos ao seu paso polo barrio de Campolongo, crear un novo parque na Parda, organizar unha nova edición dos Premios Feroz ou acoller o Campionato do Mundo de Tríatlon Multideporte, entre outros investimentos.

O portavoz local do PP Rafa Domínguez presentou unha emenda á totalidade destes orzamentos argumentando que as contas do goberno local prevén un "baixísimo gasto social". 

"Condenan a Pontevedra a seguir na decadencia na que entrou nos últimos anos", sostivo Rafa Domínguez.

Iván Puentes, o portavoz socialista, reivindicou o sentido do seu voto dicindo que prefire avanzar con 30 acordos que non facelo, en referencia aos compromisos pactados co Bloque, que se cifran en 4,1 millóns de euros para novos proxectos, obras e melloras de servizos.

Tres novas denominacións ao Rueiro 

Nesta sesión plenaria aprobouse a nova denominación de tres rúas, atendendo ao criterio do Consello de Pontevedra de conservar a toponimia tradicional municipal e o seu compromiso para que máis mulleres teñan este recoñecemento. 

A coñecida como Rolda Leste, o vial de acceso ao Hospital Montecelo desde O Marco, pasa a ser a Avenida das Chans. Unha rúa perpendicular a Juan Bautista Andrade pasará a ser a Rúa Veigas do Covo.

Á proposta dos colectivos sociais de Salcedo, recibirá o nome de Rúa de Josefa Vázquez Juncal, Señora Pepa, a rúa aberta polos antigos terreos da ONCE en Campolongo, entre Louis Braille, Santa Lucía e Pintor Urbano Lugrís.

A concelleira popular Pepa Pardo xustificou o voto en contra da súa formación indicando que os populares se negarán a calquera proposta de denominación de rúas ata que se cumpra o acordo plenario para incorporar o empresario Magín Froiz ao rueiro.

O concelleiro do BNG Demetrio Gómez lamentou esta decisión e reprochou que do PP non saíse "nin a máis mínima palabra de alento, de ánimo ou de orgullo" cara á Señora Pepa, tras o cal garantiu que "por suposto" que se propoñerá unha rúa para Magín Froiz, porque "a merece".