Lixeira caída do prezo da luz, que segue por riba dos 200 euros o megawatt hora

O prezo da electricidade no mercado almacenista volve caer levemente este sábado por terceiro día consecutivo, concretamente un 0,5 %, ata situarse nos 223,36 euros o megawatt hora ( MWh), malia que se mantén por riba dos 200 euros/MWh.

Tras este descenso, a luz é un 17 % máis cara ca o sábado pasado, día da semana no que diminúe a actividade económica e a demanda enerxética é menor, e case quintuplica o importe que marcou hai xusto un ano (47,61 euros).

Ademais, volve superar a barreira de 200 euros/MWh por sétimo día consecutivo, un valor que se alcanzou en preto do 80 % dos días de decembro e en case o 70 % dos de xaneiro.

Por franxas horarias, o prezo máximo (263,03 euros/MWh) deste sábado rexistrarase entre as 19:00 e as 20:00 horas, mentres que o mínimo, de 181,97 euros/MWh, pagarase entre as 15:00 e as 16:00 horas.

No que vai de mes, o prezo da electricidade sitúase de media nos 200,03 euros/MWh, un 16 % máis barato ca o valor de decembro, o mes máis caro da historia (239,22 euros/MWh), pero un 80 % superior ao prezo medio de 2021 (111,4 euros/MWh), o máis elevado desde que existen rexistros.