Aitana Bonmatí e Lionel Messi gañan o Balón de Ouro
Aitana Bonmatí e Lionel Messi gañan o Balón de Ouro
O arxentino logrou o oitavo galardón da súa carreira e Aitana Bonmatí gañou o primeiro logo de liderar o Barcelona e a selección española
Lionel Messi e Aitana Bonmatí foron os triunfadores da gala do Balón de Ouro. Levaron o premio máis importante como mellor xogador e xogadora do mundo en categoría masculina e feminina.
Messi marcou 38 goles na última temporada, gañou a liga francesa co París Saint Germain e, por riba de todo, logrou o ansiado Mundial coa selección da Arxentina. Tamén o título de campioa do mundo foi decisivo para que a centrocampista do Barcelona Aitana Bonmatí levase o premio á mellor xogadora do mundo e suceder a súa compañeira Alexia Putellas. Bonmatí engadiu os títulos de Liga e Champions co seu club, en que foi unha xogadora fundamental.
AITANA BONMATI IS THE 2023 WOMEN’S BALLON D’OR! #ballondor pic.twitter.com/LZnFvHpOjV
— Ballon d'Or #ballondor (@ballondor) October 30, 2023
O trofeo ao mellor xogador novo (Trofeo Kopa) foi para o futbolista do Real Madrid Jude Bellingham (20 anos). Como mellor porteiro recolleu o galardón o arxentino Emiliano Martínez, e o mellor dianteiro foi o noruegués do City Erling Haaland. Os equipos que gañaron a Champions foron os mellores do mundo: Manchester City e Fútbol Club Barcelona. Tamén recibiu un premio Vinícius, o Trofeo Sócrates polas súas achegas solidarias.
