Lendoiro reclama máis ambición para volver a ter un Deportivo na elite
O presidente da época dourada do club coruñés entende que "os números respaldan a Gilsanz" e a clave na súa opinión é investir o diñeiro en bos xogadores
Á calor das celebracións polo 25 aniversario do título de Liga, o daquela presidente, Augusto César Lendoiro, analiza o Deportivo actual. "O obxectivo do Deportivo ten que ser ascender de categoría. Si hai diñeiro e xogadores hai que ter aspiracións", comentou a Televisión de Galicia. De entrada, bota de menos máis ambición. Ten sona Lendoiro de ser pouco amigo dos trocos de adestrador. Renovaría hoxe a Gilsanz? "Os datos obxectivos son os puntos e os puntos son como para poder confiar nel", comenta Lendoiro.
Alén do banquiño, cre primordial acertar cos futbolistas. Retoma aquí unha vella frase súa. "Os cartos hai que telos no campo. Arsenio era un gran adestrador pero só foi campión cando tivo grandes xogadores. Os xogadores mandan" asegura o ex presidente do club coruñés. Coa tempada case liquidada no campo, esa é a batalla que xoga, desde xa, o Deportivo.
