"Hai que aumentar mil prazas MIR en medicina familiar nos próximos catro anos en España"

A Xunta de Galicia fai presión no Ministerio de Sanidade para que flexibilice os requisitos esixidos aos centros de saúde para que poidan formar máis médicos internos residentes en medicina familiar e comunitaria.

Nunha entrevista no programa Galicia por diante, da Radio Galega, o conselleiro de Sanidade Julio García Comesaña adiantou que esta semana a Xunta vai enviar ao Ministerio de Sanidade un documento coas medidas que considera que habería que tomar para aumentar o número de médicos de familia e paliar o déficit de especialistas nos centros de atención primaria.

"Ampliar o número de centros de saúde para formar médicos MIR sen dúbida melloraría a dispoñibilidade de médicos de familia para cubrir as ausencias e calquera outra situación", asegurou o conselleiro.

Neste momento, só 100 dos 463 centros de saúde de Galicia cumprirían os requisitos esixidos pola normativa actual para acoller médicos de familia en formación. Ampliar o número de centros permitiría, segundo o conselleiro, formar máis especialistas, cubrir as vacantes provocadas polas xubilacións e as baixas laborais e reducir a sobrecarga de traballo nos propios centros de atención primaria. 

"Isto non vén de agora. Isto foi un acordo unánime do Consello Interterritorial de abril de 2018. Todas as comunidades autónomas e o ministerio de Sanidade se comprometeron a facer este cambio, esta flexibilización".

"Levamos catro anos sen abordar este tema e as consecuencias están aí. É o momento de abordar este cambio e poder formar máis médicos canto antes".

García Comesaña sinalou que cada ano se forman arredor de 2.300 médicos residentes en medicina familiar e comunitaria e hai que chegar a formar 3.300 en catro anos.  

"As comunidades autónomas que representamos o 67 % da poboación consideramos que durante catro anos hai que incrementar o número de prazas MIR de medicina familiar e comunitaria en mil prazas en toda España".    

Este ano a maior parte das novas prazas para formación de médicos especialistas en medicina familiar e comunitaria creáronse en Galicia, asegura o conselleiro.  

"A maioría das prazas que este ano se incrementaron en formación para atención primaria foron en Galicia. Das 78 prazas que se crearon en todo o estado, 65 foron en Galicia".

Con todo, Julio García Comesaña advirte que o maior número de prazas de formación que ofrece Galicia podería ter un reverso non desexado. 

"Se só o goberno galego fai este esforzo, o resultado podería ser que os médicos doutras comunidades autónomas veñan a formarse a Galicia e despois, loxicamente, regresen á súa comunidade. É necesario que este esforzo o fagamos entre todos".

O conselleiro de Sanidade aposta pola necesidade que aplicar medidas en España para paliar a falta de especialistas en medicina familiar e comunitaria. 

"Nós non estamos por un MIR galego, como hai algún partido político que o está a defender. Nós cremos que ten que ser algo nacional, porque o sistema de formación e o propio Sistema Nacional de Saúde, como digo, é nacional".