Iván Martínez, Barbero, reforza a dianteira do Deportivo

Iván Martínez Gonzálvez, máis coñecido como Barbero, converteuse en novo xogador do Dépor para as dúas próximas temporadas, ata xuño de 2025.

O dianteiro centro andaluz, de 1,86 metros de estatura, acaba de completar unha gran campaña co C. A. Osasuna B en Primera Federación. Barbero disputou 35 partidos, 28 deles como titular, e marcou 13 goles, que o fan ser o máximo anotador do sétimo clasificado do Grupo 2 e o oitavo goleador da terceira categoría nacional.

Barbero, fillo dun exporteiro de ampla traxectoria en Segunda División B, do que herdou o alcume, formouse nas categorías inferiores do desaparecido C. P. Ejido, o A. D. Polideportivo Aguadulce e o Club Natación Almería. En categoría xuvenil foi fichado pola U. D. Almería e aos poucos meses subiu ao filial, co que debutou en Terceira División na campaña 2016-17.

No verán de 2017 asinou polo C. A. Osasuna para incorporarse ao equipo B. Co filial pamplonés xogou dúas temporadas e media en Segunda B ou Primera Federación (81 partidos e 23 goles) e unha en Terceira División (36 partidos e 18 goles).

Entre medias, debutou co primeiro equipo o 19 de decembro de 2019 en Copa do Rei ante o C. F. Lorca Deportiva e foise cedido na segunda metade do curso 2019-20 á U. D. Almería (dez partidos, un de titular, en Segunda División) e ao A. D. Alcorcón todo o exercicio 2020-21 (32 encontros, dez de inicio, e dous goles, tamén na categoría de prata).